Social Media : सोशल मीडियावर वादग्रस्त पोस्ट टाकणाऱ्यांवर गुन्हे दाखल करणार - सतीश होडगर

मंचर : “मंचर शहराला राष्ट्रीय ऐक्याची फार मोठी परंपरा आहे. सर्व जाती धर्माचे लोक गुण्यागोविंदाने राहतात. परंतु गेल्या काही दिवसापासून सोशल मीडियाच्या माध्यमातून वादग्रस्त पोस्ट, कमेंट टाकून धार्मिक तेढ निर्माण करण्याचा प्रयत्न केला जात आहे.

अशा दोषी व्यक्तींचा शोध घेण्यासाठी विशेष यंत्रणा उभी केली आहे. दोषी आढळणाऱ्याच्या विरोधात कायदेशीर कारवाई केली जाईल.” असा इशारा मंचर पोलीस ठाण्याचे पोलीस निरीक्षक सतीश होडगर यांनी दिला .

मंचर (ता.आंबेगाव) येथे सोमवारी (ता.१२) संध्याकाळी नगरपंचायत सभागृहात झालेल्या शांतता समितीच्या बैठकीत होडगर बोलत होते. यावेळी मंचर नगरपंचायतीचे मुख्याधिकारी गोविंद जाधव, राजाराम बाणखेले, सुनील बाणखेले,

प्रवीण मोरडे, दत्ता गांजाळे, वसंतराव बाणखेले, शशिकांत बढे, कल्पेश बाणखेले, शिवाजीराव राजगुरू, महेश मोरे, अश्विनी शेटे, सचिन मोरडे, रहिबर अली, हाजी मन्सूर खान पठाण उपस्थित होते.

सुरेश भोर म्हणाले, “येथील हिंदू - मुस्लीम व सर्वच जाती धर्माचे अत्यंत जिव्हाळ्याचे संबंध आहेत. शांतता व सुव्यवस्था टिकविणे प्रशासनाबरोबरच प्रत्येक नागरिकांचे कर्तव्य आहे.” अँड. अविनाश रहाणे म्हणाले, “चुकीचे काम करणार्याचे कोणीही समर्थन करू नये. दर दोन महिन्यानी शांतता समितीची बैठकीचे आयोजन करावे. त्यामुळे समज, गैरसमज दूर होण्यासाठी मदत होईल.”

संजय थोरात म्हणाले, “सामाजिक सलोखा राखून व समाजाप्रती आपले काहीतरी देणे आहे. ही भावना मनात ठेवून सर्वांनी एकत्रित आनंदाने राहणे गरजेचे आहे.” “बेकरी व अन्य उद्योगात काम करणारे कामगार व भाडेकरूच्या नोंदी मंचर पोलिसांनी कराव्यात एखादी बाहेरची व्यक्ती शांतता भंग करण्याचे काम करत असेल तर पोलिसांनी कार्यवाही करावी.” अशी मागणी आंबेगाव तालुका कॉंग्रेस पक्षाचे अध्यक्ष राजू इनामदार यांनी केली.

यावेळी दत्ता थोरात, संतोष खामकर, आशिष पुगलिया याची भाषणे झाली. जे.के.थोरात, मंगेश बाणखेले, जगदीश घिसे, सतीश बेंडे, शशिकांत बाणखेले, संदीप बाणखेले, गणेश खानदेशे यांनी चर्चेत भाग घेतला. उपस्थितानी ‘हम सब एक है’ अशा घोषणा देऊन सामाजिक ऐक्य आबाधित असल्याचा संदेश दिला. सूत्रसंचालन पोलीस उपनिरीक्षक सोमशेखर शेटे यांनी केले.