पर्यटकांच्या शेकडो वाहनांची दाऱ्या व नाणे घाटात गर्दी

जुन्नर : दाऱ्या व नाणेघाट येथे पर्यटनास बंदी असल्याने पोलीसांनी केलेली नाकाबंदी झुगारून पर्यटकांच्या शेकडो वाहनांनी रविवारी ता.२० रोजी गर्दी केली होती. कोरोनामुळे जुन्नर तालुक्यातील दाऱ्या व नाणेघाट परिसरात पर्यटनास बंदी असताना देखील येथे शनिवार-रविवारी पर्यटकांची मोठी गर्दी होत आहे. विविध ठिकाणाहून दुचाकी- चारचाकी वाहनातून आलेल्या पर्यटकांमुळे कोरोनाचा प्रादुर्भाव होण्याची शक्यता असून यामुळे गावची सुरक्षितता धोक्यात आली आहे. तरी येथे येणाऱ्या पर्यटकांवर बंदी घालावी अशी मागणी आंबोलीच्या सरपंच नामाबाई अरुण मोहरे, उपसरपंच सखाराम काठे व ग्रामसेवक टी. एस.आंभिरे यांनी एका लेखी पत्राने जुन्नरचे वनक्षेत्रपाल अजित शिंदे तसेच पोलीस निरीक्षक विकास जाधव यांचेकडे ता.१७ रोजी केली आहे.

सुट्टीच्या दिवशी येथे शंभरहून अधिक वाहने येतात.पुणे,मुंबई, ठाणे येथून येणारे तसेच स्थानिक पर्यटक येथील निसर्गसौंदर्याचा आस्वाद घेणेसाठी तसेच धबधब्याखाली मनसोक्त भिजण्याचा आनंद लुटण्यासाठी येतात. स्थानिक नागरिकांनी त्यांना प्रतिकार केला तरी ते दाद देत नाहीत. यामुळे वाद होऊन प्रसंगी भांडणे होत असतात. यामुळे येथे येणाऱ्या पर्यटकांवर कारवाई करावी अशी स्थानिक नागरिकांची मागणी आहे.

दरम्यान जुन्नर पोलिसांनी शनिवार व रविवारी दाऱ्या व नाणेघाट येथे येणाऱ्या पर्यटकांवर कारवाई करणेसाठी जुन्नर आपटाळे मार्गावर नाकाबंदी केली होती. मात्र ही कारवाई फक्त स्थानिक लोकांवर केली गेली पर्यटकांना मात्र सोडून देण्यात आले असल्याचे नागरिकांचे म्हणणे आहे. यामुळे या दोन्ही ठिकाणी गर्दी झाल्याचे स्थानिक नागरिकांकडून सांगण्यात आले. या परिसरातील जे लोक किराणा , बी- बियाणे , शेतीकाम यासाठी बाहेर पडले त्या लोकांवर कारवाई करण्यात आली. पोलीसांना थेट नाणेघाट व दाऱ्याघाट येथे नाकाबंदी करून कारवाई करायला पाहिजे अशी स्थानिकांची मागणी आहे. आपटाळे येथे नाकाबंदी केली तरी पर्यटक सुराळे मधील तेजुर रस्त्याने पीर बाबा रस्ता कोल्हाळवस्ती आपटाळे हायस्कुल रस्त्याने निघून जात होते. यावेळी वाहन परवाना नसणाऱ्यावर कारवाई केल्याने आता आता शेतावर जाताना देखील शेतकऱ्यांनी परवाना घेऊन जायचं का ? असा सवाल करण्यात येत होता.