हडपसर : सतर्क नागरिक व दामिनी मार्शलांच्या प्रसंगावधानामुळे चार दिवसाच्या बेवारस जखमी बालिकेला जीवदान देण्यात यश आले आहे. ससानेनगर येथील गल्ली नंबर १३ च्या परिसरात मंगळवारी (ता. ३१) साडेपाच वाजण्याच्या सुमारास ही घटना घडली.
हडपसर पोलिसठाण्यातील दामिनी मार्शल व तुकाईदर्शन पोलिस चौकीच्या मार्शलांना ससाणेनगर गल्ली नंबर १३ येथे दामिनी मार्शलची आवश्यकता असल्याचे फोनद्वारे समजले. त्याठिकाणी मार्शल गेले असता तेथे चार दिवसाची नवजात बालिका बेवारस स्थितीत आढळून आली. अधिक तपास केला असता या बालिकेला कोणीतरी अज्ञात व्यक्ती सोडून गेले असल्याचे निष्पन्न झाले.
दामिनी मार्शल महिला पोलीस अंमलदार वैशाली उदमले, राजश्री जाधव, मंजुषा डेंगळे, उषा सोनकांबळे व तुकाईदर्शन पोलिसचौकी मार्शल श्री. पवार यांनी बालिकेला ताब्यात घेऊन तपासले असता या बालिकेच्या अंगावर मांजराच्या नख्यांचे व्रण दिसून आले होते. त्यामुळे ही मुलगी रडत होती.
त्यांनी तात्काळ या बालिकेला जवळच्या दवाखान्यात नेऊन प्राथमिक उपचार केले. दरम्यान या बाबतची माहिती स्थानिक सामाजिक कार्यकर्ते व बाल कल्याण समितीस दिली. त्यानंतर या बालिकेला पुढील उपचारासाठी के. एम. रुग्णालयात पाठवण्यात आले.
पुढील देखभाल, काळजी व संरक्षणासाठी बालकल्याण समितीच्या आदेशाने मुलीला कोरेगाव पार्क येथील भारतीय समाजसेवा केंद्रात दाखल करण्यात आले आहे. दरम्यान, मुलीच्या अज्ञात पालकांच्या विरोधात गुन्हा दाखल करण्यात आला आहे. मार्शलांनी केलेल्या या कामाचे परिसरात कौतुक होत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.