कापूरहोळ रस्त्यावरील खड्ड्यांमुळे अपघाताचा धोका

भोर, ता. २ : कापूरहोळ ते भोर मार्गावरील रस्त्याच्या काँक्रिटीकरणाच्या कामामुळे वाहतुकीसाठी कळविलेल्या पर्यायी मार्गावर मोठ-मोठे खड्डे पडले आहेत. सुमारे दोन फूट खोल असलेल्या खड्ड्यांमुळे अपघात होण्याचा धोका निर्माण झाला आहे.

कापूरहोळ-भोर मार्गावरील सांगवी ते भोलावडे आणि आळंदे ते कासुर्डी या टापूत हे खड्डे पडलेले आहेत. एकतर कळविलेल्या रस्त्याची रुंदी अतिशय कमी आहे. त्यामुळे एकावेळी एकच वाहन जाऊ शकते. त्यातच खड्डे पडल्यामुळे वाहन चालकांना तारेवरची कसरत करून वाहन चालवावे लागते. खड्ड्यांमुळे वाहतुकीची कोंडी होत असून वाहनांच्या लांबच लांब रांगा सतत लागतात. दुचाकी आणि मोटारी या खड्ड्यांमध्ये अडकून पडत आहेत.

अधिकाऱ्यांशी संपर्क होऊ शकला नाही
संबंधित ठेकेदार रस्त्याच्या दुरुस्तीकडे दुर्लक्ष करीत आहेत. ठेकेदाराच्या गाड्याही आणि वाहनेही या खड्ड्यांत अडकून पडल्याच्या घटना घडलेल्या आहेत. तरी देखील ठेकेदाराकडून कोणत्याही उपाययोजना होत नाही. वाहनचालक नाराजी व्यक्त करीत आहेत. याबाबत सार्वजनिक बांधकाम विभागाच्या अधिकाऱ्यांशी संपर्क होऊ शकला नाही.