Pune Flood: पावसात वाहून गेलेल्या तरुणाचा मृतदेह अखेर मिळाला

Katraj: मुसळधार पावसामुळे परिसरातील ओढ्यांना व नाल्यांना पूर आला आहे. कात्रज येथील लेकटाऊन सोसायटीशेजारी असणाऱ्या आंबील ओढ्यात मासे पकडण्यासाठी गेलेला तरुण ड्रेनेज लाईनमधून वाहून गेल्याची धक्कादायक घटना गुरुवारी (ता. २५) दुपारच्या सुमारास घटना घडली होती.

भारती विद्यापीठ पोलिसासह कात्रज, गंगाधाम, जनता वसाहत व कसबा अग्निशामक दलाच्या जवानांकडून सदरील तरुणाचे शोध कार्य सुरू होते. अग्निशमन जवानांनी जवळपास दहा ते बारा चेंबर शोधले. अखेर डेंगळेपूल कुंभार वाडा व संगम ब्रिजच्या येथे तरुणाचा मृतदेह आढळून आला असून मृतदेह पुढील तपासणी साठी पोलिसांच्या ताब्यात देण्यात आला.

अक्षय संदेश साळुंखे वय २६ राहणार शिवमुद्रा चाळ अप्पर असे तरुणाचे नाव आहे. आंबील ओढ्यात पाण्याचा प्रवाह जास्त असल्यामुळे ही दुर्घटना घडली होती. कात्रज, गंगाधाम, जनता वसाहत,कसबा अग्निशमन दलाकडून सदरील तरुणाचा शोध घेण्यात आला. अग्निशमन अधिकारी सुनील नाईकनवरे, कात्रज अग्निशामक दलाचे प्रमुख प्रदीप खेडेकर, सुभाष जाधव, तांडेल भरत भारती, भरत वाडकर, फायरमन तेजस मांडवकर, अनिकत पवार, अविनाश जाधव, प्रतीक शिर्के, रोहित जाधव आदीसह दहा ते बारा जवानांनी शोधकार्य केले.