बारामतीत निर्बंध शिथील करण्याबाबत दोन दिवसात घेणार निर्णय

बारामती - शहरातील (Baramati City) निर्बंध शिथील करण्याबाबत जो पर्यंत कोरोनाच्या संसर्गाचा (Corona Infection) दर पाच टक्क्यांहून खाली येत नाही तो वर निर्णय (Decision) घेण्याबाबत अनिश्चितता आहे. पुढील दोन दिवसांच्या रुग्णांची स्थिती पाहून प्रशासनाने (Administrative) निर्बंध आणखी शिथील करायचे किंवा नाही या बाबत निर्णय घ्यावा, अशी सूचना उपमुख्यमंत्री अजित पवार (Ajit Pawar) यांनी आज दिली. (Decision will be Taken in Two Days to Relax the Restrictions in Baramati)

बारामतीत झालेल्या आढावा बैठकीत त्यांनी ही सूचना दिली. बारामतीतील कोरोनाबाधितांची संख्या कमी होत आहे या बाबत त्यांनी समाधान व्यक्त केले मात्र शासनाने ठरवून दिल्याप्रमाणे पाच टक्क्यांहून बाधितांची संख्या कमी होत नाही, तो पर्यंत निर्णय घेताना अडचणी येत आहेत.

या बैठकीत पवार यांनी यावेळी शहरासह तालुक्यातील कोरोना व म्युकर मायकोसिस प्रादुर्भावाची सद्यस्थिती, उपाययोजना, लहान बालकांसाठीच्या वैद्यकिय सुविधा, लसीकरण, आॅक्सिजन उपलब्धता, आरोग्य सुविधा आदींचा आढावा घेतला.

ते म्हणाले, कोरोनानंतर म्युकर मायकोसिसचे रुग्ण आढळून येत आहेत. त्याची लक्षणे, काळजी, उपचार यांची माहिती सर्वदूर पोहोचवावी. जनजागृती करावी. तसेच म्युकरमायकोसिसच्या उपचारासाठी वापरण्यात येणा-या इंजेक्शनचे योग्य नियोजन करावे. कोणत्याही परिस्थितीत कान, नाक, घसा तसेच इतर लक्षणे जाणवताच तातडीने रुग्णालयात जावून नागरिकांनी डॉक्टरांचा सल्ला घ्यावा.