भिगवण (पुणे) : येथील प्राथमिक आरोग्य केंद्रातील शवविच्छेदन केंद्र मागील सहा वर्षापासून बंद आहे. राष्ट्रीय महामार्गावर अपघाती किंवा अकस्मिक मृत्युचे येथे मोठे प्रमाण आहे. अशा वेळी नातेवाईकांना इंदापूर किंवा बारामती येथे मृतदेह शवविच्छेदनासाठी घेऊन जावे लागतात. त्यामुळे येथील शवविच्छेदन केंद्र तातडीने सुरु करावे व दिरंगाईस जबाबदार घटकांवर कारवाई करावी अशी मागणी भाजप युवा मोर्चाच्या वतीने करण्यात आली आहे.
याबाबत भाजप युवा मोर्चा बारामती लोकसभा विभागाचे अध्यक्ष तेजस देवकाते यांनी पुणे जिल्ह्याचे पालकमंत्री अजित पवार, आरोग्यमंत्री राजेश टोपे, राज्यमंत्री दत्तात्रय भरणे, विरोधी पक्ष नेते देवेंद्र फडणवीस, जिल्हाधिकारी व जिल्हा आरोग्य अधिकारी यांच्याकडे निवेदनाद्वारे ही मागणी केली आहे. सहा वर्षापूर्वी येथील प्राथमिक आरोग्य केंद्राच्या जुन्या इमारतीबरोबरच येथील शवविच्छेदन इमारतही पाडण्यात आली व येथील शवविच्छेदन केंद्र बंद करण्यात आले.
शवविच्छेदन केंद्र पाडताना काही दिवसांत हे केंद्र पुन्हा सुरु करण्यात येईल असे प्रशासनाच्या वतीने सांगण्यात आले होते. परंतू, मागील सहा वर्षामध्ये येथील शवविच्छेदन केंद्र सुरु न झाल्यामुळे मृतांच्या नातेवाईकांना मोठा त्रास सहन करावा लागत आहे. पुणे सोलापूर राष्ट्रीय महामार्गावर अपघाताने किंवा अकस्मित मृत्यू झाल्यास आधीच विवंचनेत असणाऱ्या नातेवाईकांना शवविच्छेदनासाठी इंदापूर किंवा बारामती येथे मृतदेह घेऊन जावे लागते.
यामध्ये बराच वेळ जातो व मनस्तापही सहन करावा लागतो. त्यामुळे येथील शवविच्छेदन केंद्र तातडीने सुरु करावे व दिरंगाईस कारणीभूत ठरणाऱ्या घटकांवर कारवाई करावी अशी मागणी तेजस देवकाते यांनी केली आहे. याबाबत भाजप युवा मोर्चा बारामती लोकसभा मतदार संघाचे अध्यक्ष तेजस देवकाते म्हणाले, सरकारी काम व सहा महिने थांब अशी म्हण होती. परंतु भिगवण येथील शवविच्छेदन केंद्राबाबत सरकारी काम आणि सहा वर्षे थांब अशी व स्थिती झाली आहे. शवविच्छेदन केंद्र बंद झाल्यामुळे मृतांच्या नातेवाईकांना मोठा मानसिक त्रास सहन करावा लागतो. भिगवण येथील शवविच्छेदन केंद्र तातडीने सुरु करावे, या ठिकाणी सक्षम अधिकाऱ्याची नेमणुक करावी व दिरंगाईस कारणीभुत घटकांवर कारवाई करावी अन्यथा तीव्र आंदोलन करु.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.