मंचर : कोकणचा राजा हापूस आंबा मंचरच्या बाजारपेठेत विक्रीसाठी उपलब्ध झाला आहे. सध्या २०० पेट्यांची दररोज मागणी असताना १०० आंब्यांच्या पेट्यांची आवक होत आहे. आंब्याची टंचाई निर्माण झाली आहे. त्यामुळे सहा ते आठ डझन आंब्याच्या पेटीचे बाजारभाव तीन ते सात हजार रुपयापर्यंत गेले आहेत. दहा ते १२ दिवसांपूर्वी आंब्याच्या पेटीचे बाजारभाव अडीच ते पाच हजार रुपयापर्यंत खाली आले होते. गुढीपाडवा मंगळवार (ता. १३) पासून आंब्याचे बाजारभाव सामान्य ग्राहकांच्या आवाक्यात येण्याची शक्यता आंबा विक्रेत्यांनी व्यक्त केली आहे.
देवगड, रत्नागिरी भागातून गेल्या १०० वर्षांपासून मल्हारराव बाबूराव कंपनीमार्फत मुंबई मंचर येथे हापूस आंब्याची विक्री केली जाते. या कंपनीने कोकण भागात आंब्याच्या बागा बागायतदाराबरोबर करार पद्धतीच्या शेतीचा प्रकल्प राबविला आहे. मंचर येथे लहान मोठे ३० व आंबेगाव तालुक्यात १०० ते १२५ आंबा विक्रेते आहेत. प्रामुख्याने हापूस आंबा विक्री करण्याचे काम केले जाते.
मल्हारराव बाबुराव कंपनीचे संचालक सतीश बेंडे पाटील म्हणाले, ''निसर्ग चक्रीवादळाचा फटका कोकणात आंब्याच्या बागांना बसला आहे. त्यामुळे ३० ते ३५ टक्के आंबा उत्पादनात घट झाली आहे. पहिल्या बाराचे आंबे फेब्रुवारी महिन्याच्या दुसऱ्या आठवड्यात मुंबई-पुणे व मंचर बाजारपेठेत दाखल झाले होते. आंबे पेटीचा सुरुवतीला सरासरी बाजारभाव तीन ते आठ हजार रुपये पर्यंत होता. १७ ते २० मार्चपर्यंत पेटीचा बाजारभाव दोन ते पाच हजार रुपयापर्यंत खाली आला होता. अजून दर कमी होतील, अशी अपेक्षा ग्राहकांची होती. पण दुसऱ्या बाराच्या कैऱ्या लगडलेल्या असतानाच हवेतील तापमानात लक्षणीय वाढ झाली. त्यामुळे कैऱ्या गळून पडल्या आहेत. त्याचाही परिणाम आंबा आवकवर झाला आहे. मध्यम वर्गीय ग्राहकांना परवडतील अशा बाजारभावात गुढी पाडव्याला आंबे उपलब्ध होतील.''
घरी पाहुणे आल्यामुळे दोन आंब्याच्या पेट्या खरेदीसाठी मंचरला आलो होतो. पण आंबे शिल्लक नाहीत, असे विक्रेत्याने सांगितले. शनिवारी किंवा रविवारी आंबे मिळणार आहेत. तीन हजार रुपये पेटी या दरानुसार विक्रेत्याला अँडव्हान्स रक्कम देऊन बुकिंग केली आहे.-सचिन कानडे, ग्राहक कळंब (ता. आंबेगाव)
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.