पुणे - राज्यातील अनुसूचित जाती प्रवर्गातील व्यावसायिक अभ्यासक्रमातील विद्यार्थ्यांना वसतिगृह भत्ता अनुदान वाटप करण्यासाठी ३५ कोटी रुपयांचा निधी वितरित करण्यात आला आहे. येत्या आठवडाभरात हा निधी संबंधित विद्यार्थ्यांच्या बँक खात्यात जमा होईल, असे राज्याचे सामाजिक न्यायमंत्री धनंजय मुंडे यांनी शनिवारी (ता.२९) सांगितले.
- पुण्याच्या बातम्या वाचण्यासाठी येथे ► क्लिक करा
राज्यातील विविध महाविद्यालयांमध्ये व्यावसायिक अभ्यासक्रमाला प्रवेश घेतलेले आणि वसतिगृह प्रवेशासाठी पात्र असूनही केवळ वसतिगृहातील रिक्त जागांअभावी वसतिगृहात प्रवेश न मिळालेल्या विद्यार्थ्यांना हे अनुदान देण्यात येते. डॉ. बाबासाहेब आंबेडकर स्वाधार योजना, असे या वसतिगृह सानुग्रह अनुदान योजनेचे नाव आहे.
चालू शैक्षणिक वर्षात (२०२०-२१) या योजनेसाठी अर्थसंकल्पात १०० कोटी रुपयांची तरतूद प्रस्तावित करण्यात आलेली आहे. कोरोनाच्या पार्श्वभूमीवर यापैकी ३५ कोटी रुपयांचा निधी तत्काळ उपलब्ध करून देण्यात आल्याचेही मुंडे यांनी यावेळी स्पष्ट केले.
दहावीनंतरचे पुढील उच्च शिक्षण घेण्यासाठी अनुसूचित जाती व नवबौद्ध घटकातील विद्यार्थ्यांना या योजनेअंतर्गत त्यांचा मासिक खर्च भागवण्यासाठी भत्ता देण्यात येतो. मात्र कोरोनाच्या पार्श्वभूमीवर अनेक योजनांच्या अंमलबजावणीवर निधीअभावी निर्बंध आलेले आहेत.राज्याची आर्थिक स्थिती सध्या बिकट आहे, अशा परिस्थितीत या विद्यार्थ्यांच्या स्वाधार योजनेनंतर्गत हक्काच्या निधीला ब्रेक लागू नये, यासाठी हा निधी उपलब्ध करून देण्यात आला आहे.
पुर्वी या योजनेची व्याप्ती ही महाधगरांपुरतीच मर्यादित होती. परंतु आता ती महानगरांपुरतीच मर्यादित न ठेवता, ती वाढवून तालुकास्तरावर शिक्षण घेत असलेल्या विद्यार्थ्यांपर्यंत पोचवण्याचा निर्णय घेण्यात आला आहे. त्यानुसार विद्यार्थ्यांची बाकी असलेली देयके देण्यासाठी तातडीने निधी उपलब्ध करून देण्यात आला आहे.
कोरोनाच्या काळात विद्यार्थ्यांना दिलासा मिळावा, या उद्देशाने या निधीसाठी मुख्यमंत्री उद्धव ठाकरे आणि उपमुख्यमंत्री व अर्थमंत्री अजित पवार यांच्याकडे निधी उपलब्ध करुन देण्यासाठी आग्रह धरला. त्यानुसार हा निधी उपलब्ध झाला आहे. यामुळे विद्यार्थ्यांना निश्र्चितच दिलासा मिळेल.
- धनंजय मुंडे, सामाजिक न्याय मंत्री.
Edited By - Prashant Patil
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.