आर्थिक व्यवहारातून चक्क डॉक्टरचा एकावर जीवघेणा हल्ला; लाथाबुक्क्यांनी मारहाण, आई-वडिलांसह पत्नीला केली शिवीगाळ

वाघोली : आर्थिक व्यवहारातून चक्क एका डॉक्टरनं (Doctor) दोन साथीदारांच्या मदतीनं गुरुवारी रात्री एकावर हल्ला केल्याची गंभीर घटना वाघोलीत घडली. या प्रकरणी तीन जणांवर गुन्हा दाखल करण्यात आला आहे.

प्रितेश प्रकाश बाफणा (वय ३६, रा. वाघोली) असे हल्ला झालेल्या व्यक्तीचे नाव आहे. या प्रकरणी जीवन रक्षक हॉस्पिटलचे डॉ. विवेक गुप्ता, अजय सावंत, प्रशांत ढमढेरे (पूर्ण नाव, पत्ता माहीत नाही.) यांच्यावर गुन्हा दाखल करण्यात आला आहे.

पोलिसांनी दिलेल्या माहितीनुसार, आर्थिक व्यवहाराच्या वादातून डॉ. गुप्ता हे साथीदारासह बाफना यांच्या घरी गेले. त्यांच्या आई-वडील व पत्नी यांना शिवीगाळ केली. बाफना यांच्या कारला कार आडवी लावून त्यांच्या कारवर दगडफेक केली.

तसेच त्यांना लाथाबुक्क्यांनी मारहाण करून जखमी केले. ते तक्रार देण्यासाठी पोलीस ठाण्यात गेले असता, त्यांना जीवे मारण्याची धमकी दिली. घटना घडल्यानंतर लोणीकंदचे वरिष्ठ पोलीस निरीक्षक सावळाराम साळगावकर, सहायक पोलिस निरीक्षक रवींद्र गोडसे, उपनिरीक्षक राहुल कोळपे यांनी घटना स्थळी भेट दिली. पुढील तपास लोणीकंद पोलीस (Lonikand Police) करीत आहेत.