पुणे : राज्यातील ग्रामपंचायत आणि सहकारी संस्थांच्या निवडणुका एकाच कालावधीत होत आहेत. त्यामुळे सहकारी संस्थांच्या निवडणुका येत्या २० डिसेंबरपर्यंत स्थगित करण्यात आल्या आहेत. या संदर्भात राज्य सरकारच्या सहकार विभागाने आज आदेश जारी केला. राज्य निवडणूक आयोगाने १८ नोव्हेंबर ते २० डिसेंबर या कालावधीत राज्यातील ७ हजार ५१ ग्रामपंचायतींचा निवडणूक कार्यक्रम जाहीर केला आहे. या ग्रामपंचायतीचा निकाल २० डिसेंबर रोजी लागणार आहे. तर, राज्य सहकारी निवडणूक प्राधिकरणानेही ७ हजार १४७ सहकारी संस्थांच्या निवडणुकांचा कार्यक्रम सुरु आहे. त्यामध्ये ‘अ’ वर्गातील ३८, ‘ब’ वर्गातील १ हजार १७०, ‘क’ वर्गातील ३ हजार १५१ आणि ‘ड’ वर्गातील २ हजार ७८८ सहकारी संस्थांचा समावेश आहे.
ग्रामपंचायत आणि सहकारी संस्थांच्या निवडणुका एकाच कालावधीत सुरु आहेत. तसेच, ‘अ’ आणि ‘ब’ वर्गातील सहकारी संस्थांच्या सदस्यांची संख्या अधिक आहे. या सहकारी संस्थांचे कार्यक्षेत्र एक किंवा अनेक तालुक्यांशी संबंधित असल्यामुळे बरेच मतदार मतदानापासून वंचित राहू शकतात. जास्तीत जास्त मतदारांच्या सहभागासाठी सहकारी संस्थांच्या निवडणुका २० डिसेंबरपर्यंत स्थगित केल्याचे सहकार विभागाने स्पष्ट केले.
राज्यातील ‘अ’ आणि ‘ब’ वर्गातील सहकारी संस्थांच्या निवडणुका ज्या टप्प्यावर असतील, त्या टप्प्यापासून २० डिसेंबरपर्यंत पुढे ढकलल्या आहेत. मात्र, वर्ग ‘क’, ‘ड’ आणि वर्ग ‘इ’ तसेच न्यायालयाने निवडणूक घेण्याबाबत आदेश दिलेल्या सहकारी संस्था वगळल्या आहेत. पुढील आदेशानुसार सहकारी संस्थांच्या निवडणुका होतील, असे राज्य सहकारी निवडणूक प्राधिकरणाचे आयुक्त डॉ. जगदीश पाटील यांनी सांगितले.
पतसंस्था फेडरेशनची निवडणुकही पुढे
महाराष्ट्र राज्य सहकारी पतसंस्था फेडरेशनची निवडणूक सुरू असून, बुधवारी उमेदवारी अर्ज माघार घेण्याचा दिवस होता. परंतु निवडणूक स्थगित झाल्यामुळे पुढील आदेशानंतरच निवडणुकीबाबत निर्णय होणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.