पुणे - इलेक्ट्रिक वाहनांच्या चार्जिंगसाठी महापालिकेने ८२ ठिकाणी चार्जिंग स्टेशन उभारण्यासाठी व चालविण्यासाठीचा प्रस्ताव मान्य केला, त्यास लगेच वर्कऑर्डर दिली. पण चार महिने उलटून गेले तरीही महापालिका प्रशासनाने ठेकेदारासोबत करार केलेला नाही, २५ लाख रुपायांची बँक गॅरंटी जमा केलेली नाही. तरी देखील महापालिकेचे अधिकारी ठेकेदाराला पायघड्या घालून त्यांच्या सोईच्या जागा शोधण्यासाठी प्रयत्न करत आहेत. (लोकल ते ग्लोबल लेटेस्ट अपडेट मिळवा सकाळच्या व्हॉट्सअप चॅनेलवर फक्त एका क्लिकमध्ये)
शहरातील इ वाहनांची संख्या वाढत असल्याने या वाहनांसाठी चार्जिंग स्टेशनची सुविधा आवश्‍यक आहे. इ वाहनांमुळे ध्वनी व हवा प्रदूषण होत नसल्याने महापालिकेतर्फे इ वाहनांना प्रोत्साहन दिले जाते. त्यासाठी उद्यान, क्षेत्रीय कार्यालय, नाट्यगृह, रुग्णालय, वाहनतळ येथे चार्जिंग स्टेशन उभारण्यासाठी निविदा काढण्यात आली होती.
या निविदेमध्ये संबंधित कंपनीला मोक्याच्या जागा आठ वर्षासाठी मोफत वापरता येतील. त्यांना जो काही नफा होइल त्यापैकी ५० टक्के हिस्सा महापालिकेचा असणार आहे. चार्जिंगसाठी यंत्रसामग्री, मोबाईल ॲप्लिकेशन, वीज मीटर घेणे, त्याचे संपूर्ण बिल भरणे, एकूण चार्जिंग स्टेशनपैकी ९५ टक्के स्टेशन सुरू ठेवणे आवश्‍यक आहे.
महापालिकेकडे २५ लाख रुपये बँक गॅरंटी देणे यासह इतर अटी वर्क ऑर्डरमध्ये आहेत. पण ठेकेदाराने नियमाचे पालन करावे याकडे महापालिकेचे अधिकारीच दुर्लक्ष करत आहेत.
अशी आहे सध्याची स्थिती
- चार्जिंग स्टेशन उभारण्यासाठी १६ मे २०२३ रोजी वर्कऑर्डर देण्यात आली
- आठ दिवसात कायदेशीर व कागदपत्रांची पूर्णता करणे आवश्‍यक होते.
- चार महिने उलटून गेले तरीही महापालिकेने ठेकेदारासोबत करार केलेला नाही
- ठेकेदाराने २५ लाख रुपयांची बँक गॅरंटी भरलेली नाही
- चार्जिंगसाठी प्रति युनिटचा दर ठरलेला नाही
- कायदेशीर व महापालिकेच्या दृष्टीने आवश्‍यक गोष्टींची पूर्तता न करता ठेकेदारासाठी जागांचा शोध सुरु
- निविदा काढताना अन्य विभागांना विश्‍वासात न घेतल्याने आता विद्युत विभाग, ठेकेदाराचे लोक विभाग प्रमुखांची घेऊन जागा मागत आहेत.
- ठेकेदारास वीज जोड मिळत नसल्याने महापालिकेतर्फे वीज देण्याचा खटाटोप सुरु, पण यामुळे नियमाचे उल्लंघन होण्याची शक्यता
‘शहरात ८२ ठिकाणी ठेकेदारामार्फत चार्जिंग स्टेशन उभारले जाणार आहेत, पण अद्याप ठेकेदार करार करून घेण्यासाठी आलेला नाही. त्यांनी बँग गॅरंटीही भरलेली नाही, तसेच चार्जिंगचे दर ठरलेले नाहीत. ठेकेदाराला अद्याप वीज जोड मिळालेला नाही, काही ठिकाणी आम्ही वीज देऊन चार्जिंग स्टेशन लवकरच सुरु करण्याचा प्रयत्न आहे.’
- श्रीनिवास कंदूल, मुख्य अभियंता, विद्युत विभाग
या प्रश्‍नाचे उत्तर नाही
मुख्य अभियंता कंदूल यांनी करार करून घेण्यासाठी ठेकेदार येत नाही, बँक गॅरंटी भरत नाही असे सांगत असताना दुसरीकडे चार्जिंग स्टेशनसाठी जागा शोधण्यासाठी अधिकारी व ठेकेदाराने नियुक्त केलेले कर्मचारी एकत्र कसे काय फिरत आहेत असे विचारले. पण त्याचे उत्तर कंदूल यांच्याकडे नव्हते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.