माजी सैनिकांना आता वैद्यकीय सेवांचा मिळणार लाभ

पुणे - दुसऱ्या महायुद्धातील माजी सैनिक, लघु सेवेतील अधिकारी (एसएससी) आणि वेळेआधीच सेवानिवृत्त होणाऱ्या माजी सैनिकांना आता वैद्यकीय सेवांचा लाभ मिळणार आहे. माजी सैनिक अंशदायी आरोग्यसेवा योजना विभागाच्या (ईसीएचएस) वतीने या माजी सैनिकांना आरोग्य सुविधा पुरविल्या जाणार आहेत.

ईसीएचएस विभागामार्फत माजी सैनिक, त्यांचे कुटुंब आणि विधवांना वैद्यकीय सेवा पुरविण्यात येते. परंतु यात काही श्रेणीतील माजी सैनिकांना हा लाभ मिळत नव्हता. यामध्ये दुसऱ्या महायुद्धातील माजी सैनिक, लघु सेवेतील निवृत्त अधिकारी, वेळेआधी सेवानिवृत्ती झालेले जवान आदींचा समावेश आहे. मात्र २०१९ मध्ये पंतप्रधान नरेंद्र मोदी यांच्या अध्यक्षतेखाली केंद्रीय मंत्रिमंडळाने या श्रेणीतील माजी सैनिकांना ईसीएचएस अंतर्गत आरोग्य सुविधा पुरविण्यासाठी मंजुरी दिली. यामुळे आतापर्यंत ईसीएचएस सेवेच्या लाभापासून वंचित असलेल्या ४० ते ५० हजार माजी सैनिक आणि अधिकाऱ्यांना देशभरातील ४०० हून अधिक ईसीएचएस पॉलिक्लिनिक, ईसीएचएस अंतर्गत येणाऱ्या अडीच हजारांपेक्षा जास्त खासगी रुग्णालये आणि सर्व सरकारी रुग्णालयांमध्ये काही अटीनुसार वैद्यकीय सेवांचा लाभ मिळण्यास सुरवात झाली. परंतु अद्याप याबाबत अनेकांना शंका असून काहींना याबाबत माहिती नसल्याचे दिसून येत आहे. त्यामुळे ईसीएचएस विभागाला यासंबंधी अनेकवेळा या श्रेणीतील माजी सैनिकांकडून आरोग्य सेवांशी निगडित प्रश्‍न विचारले जातात. याबाबत माजी सैनिकांना माहिती मिळावी या अनुषंगाने ईसीएचएस मार्फत या सूचना जाहीर करण्यात आल्या आहेत.

अशी मिळणार लाभ

- संबंधित माजी सैनिकांना ईसीएचएस पॉलिक्लिनिकमध्ये उपलब्ध नसलेल्या औषधांची बाहेरून खरेदी केल्यास औषधांच्या खर्चाचा संपूर्ण परतावा मिळणार

- यासाठी ५० किंवा ७० टक्के परताव्याची अट नसेल

- ईसीएचएस पॉलिक्लिनिकद्वारे मोफत ओपीडी सेवा

- ईसीएचएस पॉलिक्लिनिकमध्ये उपलब्ध नसलेल्या औषधांची बाहेरून खरेदी केल्यास त्याचा संपूर्ण खर्चाचा परतावा

- मात्र शस्त्रक्रिया किंवा इतर गंभीर आजारांचे ईसीएचएसने नेमलेल्या रुग्णालयात उपचार घेताना येणाऱ्या खर्चासाठी काही अटी