परीक्षेसंबंधीचे मानधन आता थेट खात्यावर

पुणे : सावित्रीबाई फुले पुणे विद्यापीठाशी सलग्न महाविद्यालयांमधील सेवकांचे परीक्षेसंबंधीचे मानधन आता थेट बॅंक खात्यावर जमा करण्यात येणार आहे. विद्यापीठाच्या वतीने लवकरच डायरेक्ट बेनिफीट ट्रान्सफर (डीबीटी) प्रणालीचा अवलंब करण्यात येणार आहे.

अधिसभेच्या दुसऱ्या दिवशी प्राचार्य डॉ. सुधाकरराव जाधवर यांनी लेखा परीक्षण अहवाल सादर करताना ही माहिती दिली. यावेळी सभेचे अध्यक्ष आणि कुलगुरू डॉ. नितीन करमळकर, प्र कुलगुरू डॉ.एन.एस.उमराणी, कुलसचिव डॉ. प्रफुल्ल पवार आदी उपस्थित होते. विद्यापीठाच्या वतीने आता व्यापारी लेखांकन (मर्केंटाईल सिस्टम) पद्धतीचा वापर करण्यात येणार आहे. ही पद्धत अवलंबणारे हे राज्यातील पहिले विद्यापीठ आहे. भाषणात डॉ. जाधवर म्हणाले, "राष्ट्रीयकृत बॅंकांबरोबरच आता सहकारी क्षेत्रातील शेड्युल बॅंकांमध्ये विद्यापीठाच्या ३० टक्के रकमेची गुंतवणुक करण्यात येणार आहे.

यामुळे व्याजाच्या उत्पन्नामध्ये भर पडण्यास मदत होणार आहे. सहकारी क्षेत्रातील नामवंत बॅंकांची आर्थित स्थिती तपासून ही गुंतवणूक करण्यात येणार आहे." यावेळी त्यांनी देशपातळीवरील बदल लक्षात घेता लेख्यांमध्ये बऱ्याच सुधारणांना वाव असल्याचेही त्यांनी यावेळी मान्य केले. आर्थिक वर्ष २०२०-२१ मध्ये एकूण तूट ही १८ कोटी ८४ लाख ४५ हजार ३९४ रूपये असल्याचे लेखा परीक्षणातून पुढे आले आहे. याच आर्थिक वर्षात विद्यापीठाला ३४५ कोटी २७ लाख ६३ हजार ९५४ रुपयांचे उत्पन्न मिळाले, तर एकूण खर्च हा ३४२ कोटी ८२ लाख ९१ हजार ४०४ एवढा झाला. विद्यापीठाला २ कोटी ४४ लाख ७२ हजार ५५० रूपयांची रक्कम शिल्लक होती. हस्तांतरीत निधीसाठी २१ कोटी २९ लाख १७ हजार ९४४ दिल्यामुळे आता विद्यापीठाकडे १८ कोटी ८४ लाख ४५ हजार ३९४ रुपयांची आर्थिक तुट आहे.