Pune Crime : नवी सांगवीत गोळीबार; तरुणाचा खून

पिंपळे गुरव : दुचाकीवर आलेल्या दोघांनी तरुणावर गोळीबार करून खून केल्याची घटना बुधवारी (रा. २९) रात्री पावणेदहाच्या सुमारास घडली.

नवी सांगवीतील माहेश्‍वरी चौकाजवळ इंद्रप्रस्थ गृहनिर्माण सोसायटीसमोर मुख्य रस्त्यावर हा प्रकार घडला; मात्र नेमके कारण समजू शकले नाही. दीपक दत्तात्रेय कदम (वय ३०, रा. जयमालानगर, जुनी सांगवी) असे खून झालेल्या तरुणाचे नाव आहे.

त्याच्यावर गोळीबार करून मारेकरी पळून गेले. दरम्यान, २०१४ मध्ये संतोष काची यांच्या खुनाचा प्रयत्न केल्याचा गुन्हा दीपकसह त्याच्या सात-आठ साथीदारांविरुद्ध दाखल आहे. गोळीबारानंतर जखमी अवस्थेत दीपक रस्त्यात पडून होता.

सांगवी पोलिस ठाण्यापासून जवळच घटनास्थळ आहे. पोलिसांनी तत्काळ दीपकला जिल्हा सामान्य रुग्णालयात दाखल केले. परंतु त्यापूर्वीच त्याचा मृत्यू झाला. कदम हा विवाहीत होता. खुनाचा गुन्हा दाखल करण्याचे काम रात्री उशिरापर्यंत सुरू होते.