मुंबई - लातूर एक्सप्रेसमधील चोरी प्रकरणी सुवर्णकारासह चौघांना अटक

दौंड - मुंबई - लातूर एक्सप्रेसमधील प्रवाशाचे सोन्याचे दागिने चोरल्याप्रकरणी तीन आरोपींना अटक करण्यात आली आहे. या प्रकरणात चोरीचा माल विकत घेणार्या एका सुवर्णकाराकडून पावणेसात लाख रूपयांचे सोने जप्त करण्यात आले आहे.

दौंड लोहमार्ग पोलिस ठाण्याचे निरीक्षक राजेंद्र गायकवाड यांनी या बाबत माहिती दिली. ३ एप्रिल २०२२ रोजी मुंबई - लातूर एक्सप्रेसने प्रवास करणार्या एका प्रवाशाकडील ९ लाख ७९ हजार रूपयांचे सोन्याचे दागिने असलेली बॅग पुणे ते दौंड प्रवासादरम्यान चोरीला गेली होती. सदर प्रकरणाचा दौंड लोहमार्ग पोलिस आणि लोहमार्ग स्थानिक गुन्हे अन्वेषण शाखा तपास करीत असताना त्यांना दस्तर्या गुलच्या काळे (वय ३६), उषा एव्हरेडी पवार (वय ३५) लक्ष्मण सतिश भोसले (वय २२) आणि एक अल्पवयीन मुलगी (चौघे रा.भूम, जि. उस्मानाबाद) यांनी चोरी केल्याची माहिती मिळाली.

सदर चोरलेले दागिने दयानंद महामुनी (रा. वालव, ता. भूम, जि. उस्मानाबाद) या सुवर्णकाराला विकल्याची माहिती मिळाली. त्यानुसार दयानंद महामुनी याच्याकडून पावणेसात लाख रूपये मूल्य असलेले १३७ ग्रॅम सोने जप्त करून त्यास अटक करण्यात आली.

पोलिस निरीक्षक राजेंद्र गायकवाड, इरफान शेख, सहायक निरीक्षक अस्मिता पाटील, फौजदार रूपाली उबाळे यांच्यासह सुनील कदम, आनंद वाघमारे, अमरदीप साळंखे, संतोष कांबळे, अरूण टिंगरे, रूपेश पवार, सुरेखा बनसोडे, साधना वाघमारे, एकनाथ लावंड, सुनील कुंवर, आदींनी कारवाईत भाग घेतला.