Ganeshotsav : विसर्जनसाठी साडेचारशे कृत्रिम हौदांची व्यवस्था

पुणे - गणेशोत्सवासाठी मंडळांप्रमाणे महापालिकेनेही तयारी सुरू केली आहे. गणेश मंडळांना सुविधा देण्यासह विसर्जन घाटावरील नियोजनाचा आढावा घेतला जात आहे. शहरातील सर्व क्षेत्रीय कार्यालयांनी विसर्जनासाठी हौद, निर्माल्य संकलन, मूर्ती दान केंद्राची माहिती सादर करण्याच्या सूचना घनकचरा व्यवस्थापन विभागाने सर्व क्षेत्रीय कार्यालयांना दिल्या आहेत.

यंदा फिरते हौद नसल्याने व नैसर्गिक प्रवाहात मूर्ती विसर्जनावर बंदी असल्याने महापालिकेतर्फे शहराच्या विविध भागात सुमारे ४५५ कृत्रिम हौदांची व्यवस्था केली जाणार आहे.

प्रदूषण नियंत्रण महामंडळाने प्लास्टर ऑफ पॅरिसच्या (पीओपी) मूर्तीच्या उत्पादनावर बंदी घातलेली आहे. पण नुकत्याच पार पडलेल्या विधिमंडळ अधिवेशनात ही बंदी उठविण्याचा निर्णय घेण्यात आला आहे.

गेले काही वर्ष महापालिकेतर्फे पीओपीच्या मूर्तींचे पाण्यात विघटन व्हावे यासाठी ऍमोनियम बायकार्बोनेटची पावडर खरेदी केली जात होती. पण प्रदूषण महामंडळाने पीओपीच्या मूर्ती उत्पादनावर बंदी आणल्याने महापालिकेने ही खरेदी केली नाही.

पण आता विधीमंडळात पीओपीच्या मूर्ती उत्पादन, विक्रीवरील बंदी उठविण्यात आलेली नसल्याने विसर्जनामध्ये पीओपीच्या मूर्तीचे प्रमाण वाढणार आहे. ऍमोनियम बायकार्बोनेटची पावडर नाही. त्यामुळे नागरिकांकडून नदी, नाले, कॅनॉल, विहिरी यासह इतर नैसर्गिक जलस्रोत असलेल्या ठिकाणी या मूर्ती विसर्जित करून हे ठिकाण प्रदूषित करू नये यासाठी महापालिकेकडून खबरदारी घेतली जाणार आहे.

क्षेत्रीय कार्यालयांना मुर्ती संकलन केंद्र, कृत्रीम विसर्जन हौदांची संख्या वाढविण्याचे आदेश देण्यात आले आहेत. यासाठी सर्व क्षेत्रीय कार्यालयांकडून घनकचरा व्यवस्थापन विभागाने माहिती मागवली आहे. प्रशासनाकडे उपलब्ध झालेल्या माहितीनुसार सुमारे ४५५ हौदांची व्यवस्था होऊ शकते असे समोर आले आहे. आवश्‍यकतेप्रमाणे यामध्ये वाढ केली जाऊ शकते, असे अधिकाऱ्यांनी सांगितले.

येत्या आठवड्यात बैठक

गणेशोत्सवापूर्वी महापालिकेत गणेश मंडळाची बैठक घेतली जाते. यामध्ये कार्यकर्ते त्यांच्या समस्या, मागण्या मांडतात. त्यावर महापालिका अधिकारी, पोलिस अधिकारी समन्वय साधून योग्य त्यावर तोडगा काढतात. ही बैठक येत्या आठवड्यात होण्याची शक्यता असल्याचे अधिकाऱ्यांनी सांगितले.