...म्हणून गणपतराव देशमुख संसदीय लोकशाहीतील पितामह : हर्षवर्धन पाटील

इंदापूर : राज्य विधिमंडळ सभागृहामध्ये गणपतराव देशमुख उर्फ आबासाहेब यांनी सकारात्मक, रचनात्मक व विकासात्मक भूमिकेतून कामकाज करत संसदीय प्रथा व परंपरांचे पालनकरून आदर्श निर्माण केला. विरोधासाठी विरोध न करता सर्वसामान्य नागरिकांचे प्रश्न सोडविण्यास त्यांनी सर्वोच्च प्राधान्य दिल्याने गणपतराव देशमुख हे संसदीय लोकशाहीतील पितामह होते, या शब्दात भाजप नेते तसेच माजी सहकार व संसदीय कार्यमंत्री हर्षवर्धन पाटील यांनी त्यांना भावपूर्ण श्रद्धांजली अर्पण केली.

पाटील पुढे म्हणाले, ''दिवंगत खासदार व माझे काका कर्मयोगी शंकरराव पाटील व गणपतराव देशमुख यांनी विधिमंडळात अनेक वर्षे एकत्र काम केल्याने इंदापूर व सांगोला तालुक्याचे अनोखे नाते तयार झाले.विधिमंडळ सभागृहात रोजगार हमी योजना कायदा व इतर लोकोपयोगी कायदे निर्माण करण्यात त्यांचा सिंहाचा वाटा आहे. विधिमंडळाचे त्यांनी सलग अकरा वेळा प्रतिनिधित्व करीत संसदीय लोकशाही कशी सांभाळायची याचा आदर्श घालून दिलेले ते ऋषितुल्य व्यक्तिमत्त्व होते. रोजगार हमी व पणन खात्याचे मंत्री म्हणून त्यांचा गाढा अभ्यास होता. सांगोला सारख्या दुष्काळी भागाला पाणी मिळावे म्हणून टेंभू, म्हैसाळ आदी योजना पूर्णत्वास नेण्यासाठी त्यांनी आयुष्य वेचले. पक्ष, नेता व संघटनेवर कशी निष्ठा असावी, याचेउत्तम उदाहरण म्हणजे गणपतराव देशमुख होत. साधी राहणी व उच्च विचारसरणी असलेल्या या नेत्याची राज्याचे ज्येष्ठ मार्गदर्शक अशी ओळख होती. असा नेता पुन्हा होणे नाही, ''या शब्दात पाटील यांनी त्यांना श्रद्धांजली अर्पण केली.