Pune : कात्रज-कोंढवा मार्गावर रस्त्याच्या कामासाठी खोदलेल्या खड्ड्यात पडून मुलीचा मृत्यू; तीन मुलींना वाचवण्यात यश

कोंढवा : कात्रज-कोंढवा रस्ता (Katraj-Kondhwa Road) रुंदीकरणाच्या कामासाठी खोदलेल्या खड्ड्यातील पाण्यात चार मुली पडल्याची घटना शनिवारी (ता. ८) दुपारी १२ वाजण्याच्या सुमारास घडली. गगन उन्नती सोसायटीसमोर महाकाली मंदिराजवळ (Mahakali Temple) असणाऱ्या १५ फूट खड्ड्यामध्ये पावसाचे पाणी साचलेले आहे. या खड्ड्यात मुली कपडे धुण्यासाठी गेल्या असता पडल्या.

पोलिसांनी (Police) दिलेल्या माहितीनुसार, कात्रज-कोंढवा रस्त्याचे काम सुरू असून त्या ठिकाणी महाकाली मंदिराजवळ काही लोक तातपूरत्या स्वरूपाच्या झोपड्या टाकून राहतात. त्यामुळे शेजारी असणाऱ्या पाण्याच्या खड्ड्यात येथील महिला व मुली कपडे धुण्यासाठी जात असतात. कपडे धुण्यासाठी गेले असता, खड्ड्यामध्ये पाय घसरून मुली पडल्यायाची माहिती प्रत्यक्षदर्शिनी अग्निशमन दलला व पोलिसांना दिली.

तोपर्यंत स्थानिकांनी तीन मुलींना बाहेर काढले होते. मात्र, एका मुलीला वाचविण्यात अपयश आले. अग्निशामक दलाच्या जवानांनी चौथ्या मुलीला बाहेर काढून रुग्णालयात दाखल केले असून डॉक्टरांकडून तिला मृत घोषित करण्यात आले. पुढील तपास कोंढवा पोलिस करत आहेत.

सरगम शिळावत (वय १५), सेजल शिळावत (वय १३), जानू शिळावत (वय १५) अशी पाण्यातून बाहेर काढलेल्या तर मुस्कान शिळावत (वय १६) असे मृत मुलीचे नाव आहे. कोंढवा अग्निशामक दलाकडून ड्रायव्हर समीर तडवी, तांडेल दशरथ माळवदकर, फायरमन प्रकाश शेलार, अभिजीत थळकर, विश्वजीत वाघ यांनी मुलीचे शोधकार्य केले.