पुणे महानगरपालिकेला थेट लस खरेदीसाठी राज्याच्या परवानगीची गरज नाही

पुणे : मुंबई महापालिकेप्रमाणे पुणे महानगरपालिकेलाही ग्लोबल टेंडरची परवानगी देण्यात आली आहे. पुणे शहरातील लसीकरण गतीने करण्यासाठी पुणे महापालिकेने ‘ग्लोबल’ टेंडर करण्यासाठी प्रयत्न सुरू केला आहे. आज पुण्यात पालकमंत्री अजित पवार यांच्या उपस्थितीत कोरोना आढावा बैठक होत आहे. यावेळी पुणे महापालिकेचे सभागृह नेते गणेश बिडकर यांनी अजित पवारांना लसीच्या खरेदीला परवानगी देण्याबाबत निवेदन दिले. ''वास्तविक अशा प्रकारे राज्यसरकारच्या परवानगीची आवश्यकता नसून पुणे महानगरपालिका लस थेट खरेदी करु शकते,'' असे अजित पवार यांनी सांगितले असून आता लवकरच निविदा काढण्यात येतील अशी प्रतिक्रिया गणेश बिडकर यांनी दिली

राज्य सरकार व केंद्र सरकारकडून येणारी लस ही पुण्याला अपुरी ठरत असून शहरातील लसीकरण केंद्रांवर गोंधळ होत आहे. नागरिकांना ऑनलाइन बुकिंग मिळेना आणि थेट केंद्रावर गेल्यास वशिल्याशिवाय काय होत नाही, अशी स्थिती आहे. पुढील काळात पुण्यासाठी किती लस राज्य व केंद्रातून मिळणार हे देखील स्पष्ट नाही. त्यामुळे पुणे महापालिकेने थेट ‘ग्लोबल’ टेंडर काढून लस खरेदी करण्याचा प्रयत्न सुरू केला आहे.

ज्येष्ठ नागरिक आणि १८ ते ५९ या वयोगटातील लसीकरणासाठी पात्र असणाऱ्यांची संख्या सुमारे ३१ लाख ५० हजार इतकी आहे. प्रत्येक नागरिकास दोन डोस याप्रमाणे महापालिकेला किमान ६३ लाख डोसची आवश्‍यकता आहे. आत्तापर्यंत ९ लाख डोस देण्यात आलेले आहेत. तिसऱ्या लाटेपूर्वी पुण्यात जास्तीत जास्त लसीकरण करणे आवश्‍यक असल्याने त्यादृष्टीने पालिकेने तयारी सुरू केली आहे.