भारतीय तंत्रशिक्षण परिषदेची विद्यार्थ्यांसाठी हेल्पलाईन सुरू

पुणे - लॉकडाउनमुळे शाळा, महाविद्यालये बंद आहेत. या परिस्थितीत विद्यार्थ्यांना अडचणींचा सामना करावा लागू नये म्हणून व्यावसायिक शिक्षण घेणाऱ्या देशभरातील विद्यार्थ्यांसाठी अखिल भारतीय तंत्रशिक्षण परिषदेने (एआयसीटीई) हेल्पलाईन सुरू केली आहे. अभ्यास असो की वैद्यकीय सल्ला हे सर्व या हेल्पलाईनद्वारे मिळणार आहे.

बातम्या ऐकण्यासाठी डाऊनलोड करा ई-सकाळचे ऍप

महाविद्यालये बंद असल्याने विद्यार्थी घरीच आहेत. त्यामुळे त्यांचे शैक्षणिक नुकसान कसे टाळता येईल याबाबत शिक्षणक्षेत्र चिंतेत आहेच; परंतु वेगवेगळे प्रयोगही केले जात आहेत. विद्यार्थ्यांना ऑनलाईन धडे देण्यास सुरवात झालेली आहे. यात तंत्रशिक्षण विभाग मागे नाही. एक पाऊल पुढे टाकत तंत्रशिक्षण परिषदेने विद्यार्थ्यांसाठी सुलभ अशी हेल्पलाईन सुरू केली आहे. ही हेल्पलाईन म्हणजे पोर्टल आहे. एखादा विद्यार्थी मदत मिळवण्यासाठी या पोर्टलवर गेला की सुरवातीला त्याला त्याचे शहर विचारले जाते. त्यानंतर कोणती मदत हवी, असा प्रश्न दिसतो. त्याखाली विविध बाबींची यादी दिसते.

त्यावर क्‍लिक केल्यावर तुम्हाला हवी ती मदत मिळण्याचे मार्ग खुले होतात. ऑनलाईन वर्ग, शिष्यवृत्ती, लायब्ररी, पुस्तके, समुपदेशन, राहण्याची सुविधा, आरोग्य, औषधे, इंटरनेट कनेक्‍टिव्हिटी आणि प्रवासविषयक सुविधांबाबत ही यादी आहे. तुम्ही आवश्‍यक मदतीच्या टॅबवर क्‍लिक केल्यास समोर संबंधित व्यक्तीच्या नावासह मोबाईल नंबर दिसतात. त्या मोबाईल क्रमांकावर फोन करून विद्यार्थी मदत मिळवू शकतो. https://helpline.aicte-india.org  या संकेतस्थळावर विद्यार्थ्यांना ही मदत मिळेल.