Pune : वडगावपीर व मांदळेवाडी परिसरात शेतीचे प्रचंड नुकसान

पारगाव : आंबेगाव तालुक्याच्या पुर्वभागातील वडगावपीर व मांदळेवाडी परिसरात काल सोमवारी रात्री दहा ते बारा वाजण्याच्या सुमारास ढगफुटी सदृष्य मुसळधार पाऊस झाल्याने अनेक ठिकाणी शेताला तळ्याचे स्वरूप आल्याने शेती पिकांचे प्रचंड नुकसान झाले आहे.

तसेच परिसरातीत अनेक रस्त्यांवरील साकव पुल पुराने वाहून गेल्याने नागरिकांचा दळणवळणाचा प्रश्न निर्माण झाला आहे सार्वजनिक बांधकाम विभागाने या पुलांची तातडीने दुरुस्ती करावी अशी मागणी वडगावपीरच्या सरपंच मिरा पोखरकर यांनी केली आहे

वडगावपीर लोणी रस्त्यावर वडगावपीर स्मशानभूमी जवळील पूलाचा भराव पुराच्या पाण्याने वाहून गेल्याने रस्त्याला मोठे भगदाड पडले आहे.तसेच पोखरकर मळा नंबर दोन व तीन कडे जाणारा रस्ता व साकव पूल वाहून गेला आहे त्यामुळे नागरिकांसह विद्यार्थ्यांची गैरसोय झाली आहे. जोरदार पावसाने शेतीचेही मोठ्या प्रमाणात नुकसान झाले आहे.

मांदळेवाडी येथील धरण वस्तीवरून येणार्या ओढ्याला प्रचंड पूर आल्याने स्मशानभूमीचे व तेथील पूलाचे मोठे नुकसान झाल्याने पूलाचा मोठा भराव वाहून गेला तर ढगेवस्तीकडे जाणार्या रस्त्याच्या पूलाचेही नुकसान झाले. पालेकर वस्ती,धरण वस्ती,ढगेवस्ती येथील शेतातील पिकांचे मोठे नुकसान झाले आहे.अनेक ठिकाणी शेतातील पीक मातीसह वाहून गेले आहे. परिसरातीत अनेक रस्त्यांचे पूलांचे भराव पुराने वाहून गेले आहेत.

या दोन्ही गावात सार्वजनिक बांधकाम विभागाने रस्त्याची त्वरित दुरुस्ती करावी व महसूल विभागाने शेती पिकांचे झालेल्या नुकसानीचे पंचनामे करून नूकसानग्रस्त शेतकर्यांना नुकसान भरपाई द्यावी अशी मागणी वडगावपीरचे माजी सरपंच संजय पोखरकर व मांदळेवाडीचे सरपंच कोंडीभाऊ आदक, ग्रामपंचायत सदस्या ज्योती गोरडे यांनी केली आहे.

वडगावपीर ता. आंबेगाव : परिसरात काल झालेल्या मुसळधार पावसाने पोखरकर मळा नंबर दोन व तीन कडे जाणारा रस्ता व साकव पूल वाहून गेला आहे नागरिकांसह विद्यार्थ्यांची गैरसोय झाली आहे. मांदळेवाडी ता. आंबेगाव : परिसरात काल झालेल्या मुसळधार पावसाने स्मशानभूमीजवळ भराव वाहून गेला आहे.