Junnar News : आकाशातून शेतात पडला तब्बल 30 ते 40 किलोचा मोठा बर्फाचा गोळा; पाहण्यासाठी बघ्यांची गर्दी

ओतूर : ओतूर (ता. जुन्नर) येथून जवळच असलेल्या डोमेवाडीत सोमवारी दुपारी आकाशातून (Sky) वेगाने बर्फाचा मोठा गोळा खाली जमिनीवर पडला. स्थानिक नागरिकांच्या माहितीनुसार, हा बर्फाचा गोळा अंदाजे ३० ते ४० किलोचा असावा.

ओतूर येथील डोमेवाडीत बाबाजी वाजगे यांच्या सोयाबीनच्या शेतात दुपारी साडेबारा वाजेदरम्यान बर्फाचा मोठा गोळा पडला. याच परिसरातील काही शेतात काम करणाऱ्या नागरिकांनी तो पाहिला, तसेच काही मुलांनी तेथील बर्फ खेळण्यासाठी नेला. त्यानंतर येथे बघ्यांची गर्दी जमली.

याबाबत माहिती मिळाल्यानंतर ओतूरचे मंडलाधिकारी विजय फलके, तलाठी अतुल विभूते, कर्मचारी संदीप राऊत यांनी सदर ठिकाणी दुपारी अडीच वाजेदरम्यान जाऊन पाहणी केली. यावेळी तो बर्फाचा गोळा वितळला होता. मात्र, त्याठिकाणी पाणी व छोटा खड्डा पडलेला दिसून आला आहे.