Pune Rain Updates: पुण्यासाठी पुढचे तीन दिवस महत्त्वाचे, हवामान विभागाने काय इशारा दिला?

IMD Weather Forecast And Rain Updates Pune: राज्यातील मुंबई, पुणे, सांगली, सातारा आणि कोल्हापूरसह कोकणातील काही जिल्ह्यांमध्ये पावसाचे रौद्ररूप पाहायला मिळत आहे. अनेक ठिकाणी पासामुळे जनजीवन विस्कळीत झाले आहे. पावसाचा फटका बसल्याने अनेकांना स्थलांतर करावे लागत आहे.

दुसरीकडे पुण्यातही गेल्या आठवड्यात पावसाने धुमाकूळ घातला आहे. त्यामुळे खडकवासला धरणातून अतिरिक्त पाण्याचा विसर्ग करावा लागला. परिणामी शहराला याचा फटका बसला.

आता पुणे शहरासाठी पुढचे दोन दिवस महत्त्वाचे असणार आहेत. कारण हवामान विभागाने पुण्यासाठी ऑरेंज अलर्ट जारी केला आहे.

हवामान विभागाने पुणे शहरासाठी 27 जुलै रोजी ऑरेंज अलर्ट जारी केला आहे. यासह घाट परिसरात मुसळधार ते अतिमुसळधार पावसाचा अंदाज वर्तवला आहे. दुसरीकडे मैदानी भागात हलका ते मध्यम तिव्रतेचा पाऊस पडण्याची शक्यता आहे.

दुसरीकडे 28, 29 आणि 30 जुलैसाठी पुण्याला यलो अलर्ट जारी करण्यात आला असून, या तीन दिवसांत शहरासह घाट परिसरात मुसळधार ते अतिमुसळधार पावसाचा अंदाज हवामान विभागाने वर्तवला आहे.

दोन दिवसांपूर्वी खडकवासला धरणातून पाण्याचा विसर्ग वाढवल्याने शहरातील अनेक भागांत पाणी शिरले होते. मात्र, धरण परिसरात शुक्रवारी पावसाचा जोर कमी झाल्याने सुरु असलेला विसर्ग काल रात्रीपासून बंद करणयात आला आहे.

गेल्या काही दिवसांत खडकवासला धरण परिसरात अतिमुसळधार पाऊस झाल्याने धरण भरले होते. त्यामुळे तीन दिवसाांच्या कालावधीत धरणातून अडीच टीमसी पाणी सोडण्यात आले होते.

सध्याच्या परिस्थितीत खडकवासला प्रकल्पातील चार धरणांमध्ये मिळून एकूण 22.62 टीएमसी इतका पाणीसाठा उपलब्ध आहे.

दरम्यान खडकवासला धरणातील पाण्याचा विसर्ग बंद करण्यात आला असला तरी, गेल्या काही दिवसांत धरणातून सोडलेल्या पाण्याचा शहरातील अनेक भागांना फटका बसला आहे. गुरूवारी धरणातून जास्त पाणी सोडल्यामुळे सिंहगड भागातील एकतानगरीमधील अनेक सोसायट्यांमध्ये छातीपर्यंत पाणी शिरले होते. त्यामुळे लोकांना आपली घरे सोडावी लागली होती.