पुणे व्यापारी महासंघाचे महापालिका आयुक्तांना साकडे; केली 'ही' मागणी!

पुणे : लाॅकडाऊनमुळे व्यापारी, व्यावसायिक तसेच सर्वसामान्य नागरिकांचे ही मोठ्या प्रमाणावर नुकसान होत असल्याने कोणत्याही परिस्थितीत लाॅकडॉउनमध्ये वाढ करण्यात येऊ नये, अशी मागणी पुणे व्यापारी महासंघाने महापालिका आयुक्तांकडे केली आहे.

व्यापारी महासंघाचे अध्यक्ष फत्तेचंद रांका आणि सचिव महेंद्र पितळीया यांनी शनिवारी (ता.१८) सकाळी पुणे महापालिका आयुक्त विक्रमकुमार यांची भेट घेतली. त्यावेळी चर्चा करताना २३ जुलैनंतर कोणत्याही परिस्थितीत लॉकडाउन वाढवू नये, ही आग्रही मागणी केली.

- कोरोनाबाधितांवर उपचार करणारे डॉ. लाटणे तीन महिन्यांपासून गेले नाहीत घरी​

रांका म्हणाले, तीन महिन्यांच्या लॉकडाउन नंतर व्यवसायाला कशीबशी सुरवात होत असताना पुन्हा एकदा लॉकडाउन लादल्याने व्यापारी त्रस्त झाले असून, व्यापाऱ्यांमध्ये तीव्र असंतोष आहे. तसेच व्यापाऱ्यांना कोणतेही सरकारी अनुदान मिळत नाही तसेच करांमध्ये कोणतीही सूट मिळत नाही, एकीकडे बँकांचे व्याज, दुकानाचे भाडे, भरमसाठ लाइट बिल, कर्मचाऱ्यांचे पगार, घरखर्च असे अनेक खर्च चालू आहेत आणि दुसरीकडे व्यवसायच ठप्प असल्याने कोणतीही आवक नसल्याने व्यापारी आर्थिक संकटात सापडले आहेत. त्यांना या संकटातून बाहेर काढणे ही सरकारचीही जबाबदारी आहे, असे नमूद केले.

- लॉकडाउनमध्ये रविवारपासून पुणेकरांना दिलासा! किराणा, भाजीपाला, फळ बाजार 'या' वेळात राहणार सुरू

कोरोना आणि अर्थव्यवस्था हे दोन्ही रुळावर आणण्याची आता गरज असून, लॉकडाउनमुळे पुण्यात व्यवसायाचे मोठ्या प्रमाणावर नुकसान झाले आहे. ते पुन्हा भरून निघणे अशक्य आहे. तसेच दुकानांसाठी सम-विषमचे (P1/P2) बंधन काढून टाकण्यात यावे. जेणेकरून संभ्रम न राहता व्यापारी आणि ग्राहकांनाही ते सोयीचे होईल.

कोरोनाचा प्रसार रोखण्यासाठी मनपा आणि व्यापारी महासंघ यांच्या संयुक्त प्रयत्नाने कोरोना तपासणीची शिबिरे भरवण्याचा मानस यावेळी आयुक्तांनी व्यक्त केला. त्यालाही व्यापारी महासंघाने सकारात्मक प्रतिसाद दिला. आणि २३ तारखेनंतर यावर काम करण्याचे ठरल्याचे रांका यांनी सांगितले.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)