आरोग्य विभागातील रिक्त पदे एमपीएससीमार्फत भरणे अशक्य

पुणे : राज्यातील आरोग्य विभागातील रिक्त पदे ही महाराष्ट्र लोकसेवा आयोगामार्फत (एमपीएससी) भरणे अशक्य आहे. कारण एवढ्या मोठ्या पदांसाठीच्या सगळ्या परीक्षा एमपीएससीमार्फत घेणे अवघड आहे. परत आरोग्य विभागातील भरतीसाठी घेण्यात आलेल्या परीक्षेतील पेपरफुटी प्रकरणातील दोषी व्यक्तींवर कडक कारवाई केली जाईल. ही कारवाई एवढी कडक असेल की, परत कोणी असे पेपर फोडण्याचे धाडस करणार नाही, असे राज्याचे उपमुख्यमंत्री अजित पवार यांनी शुक्रवारी (ता.१०) पुण्यात पत्रकार परिषदेत बोलताना सांगितले.

राज्याचे आरोग्यमंत्री राजेश टोपे यांनी आरोग्य विभागातील रिक्त जागा भरण्यासाठीचे चांगले नियोजन केले होते. राज्य सरकारने याबाबत घेतलेले निर्णय स्वीकारले पाहिजेत. पण काहींनी या निर्णयांना फाटा देत चुकीचे कामे करण्याचा प्रयत्न केला आहे. ज्याच्या चुका असतील, त्याच्यावर कारवाई केली जाईल. एवढी कडक कारवाई केली जाईल की, परत कोणी असं करण्याची हिंमत करणार नाही, असे पवार यांनी यावेळी स्पष्ट केले.

पुणे जिल्ह्यातील कोरोना परिस्थितीचा अजित पवार यांनी शुक्रवारी पुण्यात एका बैठकीत आढावा घेतला. या बैठकीनंतर ते पत्रकारांशी बोलत होते. ते म्हणाले, "पेपरफुटी प्रकरणामुळे ही परीक्षा रद्द करण्याची मागणी होऊ लागली आहे. मात्र याबाबत सर्व बाबींचा विचार करून आणि या संबंधित सर्व घटकांशी चर्चा करुन मंत्रिमंडळाच्या बैठकीत एकमताने निर्णय घेतला जाईल. हा निर्णय राज्यस्तरावरचा असेल. हा निर्णय घेताना परीक्षार्थी उमेदवारांचे नुकसान होणार नाही, याचीही काळजी घ्यावी लागणार आहे."