पुण्यात ऑक्सिजनवरील रुग्णांत वाढ

पुणे : ऑक्सिजन लागणाऱ्या कोरोनाबाधीतांची संख्या गेल्या नऊ दिवसांमध्ये एक हजार १२४ ने वाढली असल्याची माहिती पुढे आली आहे. १० एप्रिलला चार हजार ७४६ रुग्ण ऑक्सिजनवर होते. ही संख्या आता पाच हजार ८७० पर्यंत वाढल्याचे दिसते.

शहरात कोरोनाचा उद्रेक प्रचंड वेगाने वाढत आहे. रोज सुमारे पाच हजार नवीन रुग्णांची भर पडत आहे. त्यापैकी काही रुग्णांना दम लागणे, श्वास घ्यायला त्रास होणे, छाप लागणे, श्वास गुदमरणे असे त्रास होतात. सामान्य माणसाच्या रक्तातील ऑक्सिजन ९५ ते १०० टक्के असते. मात्र, काही कोरोनाबाधीतांच्या रक्तातील ऑक्सिजनचे प्रमाण कमी होते. अशा ऑक्सिजनचे प्रमाण कमी झालेल्या रुग्णांना ऑक्सिजन द्यावा लागतो.

शहरातील ऑक्सिजनवर जाणाऱ्या कोरोनाच्या रुग्णांचे प्रमाण झपाट्याने वाढले आहे. त्याचा थेट परिणाम रुग्णालयांमधील ऑक्सिजनची मागणी वाढण्यावर झाला आहे, असे निरीक्षण डॉक्टरांनी नोंदविले आहे.

पुण्यात १८ फेब्रुवारीला ३०८ रुग्ण ऑक्सिजनवर होते. त्यावेळी अत्यवस्थ रुग्णांची संख्या १५४ होती. गेल्या दोन महिन्यांमध्ये कोरोनाचा पुन्हा उद्रेक सुरु झाला. त्यामुळे ऑक्सिजनवरील रुग्णांची संख्या ३०८ वरून पाच हजार ८७० पर्यंत वाढली. तर, सद्यःस्थितीत एक हजर २५० रुग्ण अत्यवस्थ आहेत, अशी माहिती महापालिकेतर्फे देण्यात आली.

पुणे जिल्ह्यात गेल्या आठवड्यापर्यंत वैद्यकीय ऑक्सिजनची मागणी प्रत्येक दिवशी ३०० ते ३५० मेट्रिक टनापर्यंत होती. मात्र, आता ही मागणी प्रतिदिन ३७५ मेट्रिक टनापर्यंत वाढली असल्याची माहिती जिल्हा प्रशासनाने दिली. यापैकी ७० टक्के ऑक्सिजनचा एकट्या पुणे शहरात पुरवठा करण्यात येतो, असेही स्पष्ट केले.