रेल्वेत चोरी करणारी आंतरराज्य टोळी जेरबंद

दौंड - रेल्वे प्रवाशांच्या बॅगा आणि मोबाइल संच चोरी करणार्या एका आंतरराज्य टोळीला दौंड शहरात जेरबंद करण्यात आले आहे. टोळीत हरियाणा व दिल्ली येथील एकूण सहा जणांचा समावेश आहे.

दौंड पोलिस ठाण्याचे निरीक्षक विनोद घुगे यांनी याबाबत माहिती दिली. रेल्वे गाड्यांमध्ये चोरी करणारी एक टोळी दौंड शहरात आल्याची माहिती मिळताच दौंड पोलिसांनी दौंड - सिध्दटेक रस्त्यालगत गोवा गल्ली मधील एका घरातून टोळीतील विनोद सतबीरसिंग (वय ३५), राकेश महावीर ( वय ४५ ), हंसराज दुपसिंग (वय ३३), दिपक एस. राकेश (वय २९), राजेन रोशन कुमार ( वय ३२, चौघे रा. हिसार, हरियाणा) व महिंद्र सोनु मुन्शीराम (वय ५२, रा. दिल्ली) या सहा जणांना ताब्यात घेतले.

पोलिसांनी टोळीतील सदस्यांकडून रोख २३ हजार रूपये, ०७ मोबाइल संच, ४८ नवे मोबाइल सीमकार्ड आणि बॅगा चोरण्यासाठी लागणारे उपकरणे, आदी साहित्य जप्त केले. निरीक्षक विनोद घुगे यांच्यासह फौजदार शहाजी गोसावी, हवालदार पाडुरंग थोरात, सुभाष राऊत, महेश भोसले, देसाई, पोलिस नाईक अमोल गवळी, नारायण वलेकर, कॉन्स्टेबल किशोर वाघ, अभिजीत गिरमे, निलेश वाकळे यांनी या कारवाईत भाग घेतला.

दौंड रेल्वे स्थानकावरून मांसाहारी जेवण करण्यासाठी गोवा गल्ली मध्ये ही टोळी आली होती, अशी प्राथमिक माहिती पुढे आली आहे. या टोळीविरूध्द मुंबई व परिसरातील लोहमार्ग पोलिस ठाण्यात एकूण पाच गुन्हे दाखल आहेत. दौंड पोलिसांनी या सहा संशयित आरोपींना पुढील तपास व कारवाईसाठी मुंबई लोहमार्ग पोलिस आयुक्तालयांतर्गत भाईंदर युनिटच्या अधिकार्यांच्या ताब्यात दिले आहे.