NASA : जळगाव सुप्याच्या वैष्णवी खोमणे हीची नासाच्या अभ्यास दौऱ्यासाठी निवड

सुपे - विद्या प्रतिष्ठानच्या सुपे (ता. बारामती) येथील सुपे इंग्लिश माध्यमाच्या शाळेची विद्यार्थीनी वैष्णवी बापुराव खोमणे हीची अमेरिकेतील नासाच्या आठ दिवसांच्या अभ्यास दौऱ्यासाठी निवड झाल्याची माहिती प्राचार्य योगेश पाटील यांनी दिली. सुपे परगण्यातून एका शेतकऱ्याच्या मुलीने नासापर्यंत भरारी मारणारी ही पहिलीच विद्यार्थीनी असल्याने तीचे परिसरातून अभिनंदन होत आहे.

यूएस नॅशनल एरोनॉटिक्स अँड स्पेस अॅडमिनिस्ट्रेशनच्या (नासा) सहकार्याने हंट्सविले, अल्बामा येथील यूएस स्पेस अँड रॉकेट सेंटर येथे प्रशिक्षण कार्यक्रम निवडीसाठी परीक्षा घेण्यात आली होती. ही परीक्षा स्वान रिसर्च अँड सोशल स्टडी फाऊंडेशन आणि सेडोर इंटरनॅशनलद्वारे २६ ऑगस्ट २०२३ रोजी घेण्यात आली होती. ही परीक्षा प्रामुख्याने गणित, विज्ञान, भूगोल आणि बुद्धीमापन यावर आधारीत होती. या परीक्षेत तीची निवड झाली.

वैष्णवीचे वडील फीटर काम व स्पेअरपार्टचे दुकान सांभाळून शेती करतात. आई गृहिणी आहे. तालुक्याच्या जिरायती दुष्काळी पट्ट्यातील गावातून तीने मारलेली नासाच्या अभ्यासासाठीची भरारी अभिमानास्पद असल्याने तीचे परिसरातून कौतुक होत आहे.

वैष्णवी खोमणे हिच्या या यशाबद्दल संस्थेच्या विश्वस्त सौ. सुनेत्रा पवार, उपाध्यक्ष अॅड. अशोक प्रभुणे, खजिनदार युगेंद्र पवार, सचिव नीलिमा गुजर, सदस्य किरण गुजर, डॉ. आर. एम. शहा, मंदार सिकची, रजिस्ट्रार श्रीश कंभोज आदींनी अभिनंदन केले.

राज्यातून ११ विद्यार्थ्यांची निवड -

नासाच्या आठ दिवसांच्या अभ्यास दौऱ्यासाठी या परीक्षेतून राज्यातील अकरा विद्यार्थ्यांची निवड करण्यात आली. या परीक्षेमध्ये विद्या प्रतिष्ठानच्या सुपे इंग्लिश मीडियम स्कूलची इयत्ता दहावीची विद्यार्थिनी वैष्णवी खोमणे हिने उत्तम यश मिळवत ११ विद्यार्थ्यांमध्ये स्थान मिळवल्याची माहिती प्राचार्य पाटील यांनी दिली.

या अभ्यास दौऱ्यात त्यांना त्यांच्या विद्यार्थीदशेत अंतराळ संशोधन आणि प्रात्यक्षिके यांचा अभ्यास करायला मिळणार आहे. स्वान फाऊंडेशनच्यावतीने निवड झालेल्या विद्यार्थ्यांचा पुण्यात शनिवारी (ता.२) गौरव होणार आहे.