जपानचे भारतातील राजदूत हिरोशी सुझुकी यांनी काही दिवसांपूर्वीच पुण्यात वडापावचा आस्वाद घेतला. यावेळी त्यांच्या पत्नीदेखील त्यांच्या सोबत होत्या. वडापाव खातानाचा आपला व्हिडिओ हिरोशी यांनी ट्विटरवर शेअर केला होता. रविवारी पंतप्रधान मोदींनीही हा व्हिडिओ पाहून यावर प्रतिक्रिया दिली.
थोडा तीखा कम प्लीज..
हिरोशी हे एका कार्यक्रमासाठी पुण्यात आले होते. यावेळी त्यांनी वडापाव आणि मिसळ या गोष्टींवर ताव मारला. आपल्याला भारतीय स्ट्रीट फूड अतिशय आवडल्याचं ते म्हणाले. मात्र, त्यांनी यावेळी एक तक्रारही केली. ती म्हणजे, या गोष्टी त्यांच्यासाठी खूपच तिखट होत्या. त्यांनी आपल्या ट्विटमध्येही 'थोडा तीखा कम प्लीज' असं लिहिलं आहे.
जपानचे राजदूत हिरोशी यांनी पुण्यातील या अनुभवाचे आणखी व्हिडिओ ट्विटरवर पोस्ट केले आहेत. यातील एका व्हिडिओमध्ये हिरोशी आणि त्यांच्या पत्नी वडापाव खाताना दिसतायत. 'माझ्या पत्नीने मला हरवलं' असं कॅप्शन देत हिरोशी यांनी हा व्हिडिओ शेअर केला आहे. या व्हिडिओला पंतप्रधान मोदींनी रिट्विट करत आपली प्रतिक्रिया दिली आहे.
मोदी म्हणतात, आणखी येऊदे
"मि. राजदूत, तुम्ही भारतातील पदार्थांचा आस्वाद घेत आहात आणि ते अशा नवीन पद्धतीने सादरही करत आहात हे पाहून आनंद झाला. असे व्हिडिओ येत राहूदेत" अशा आशयाचं ट्विट पंतप्रधान नरेंद्र मोदींनी केलं आहे. यासोबतच हिरोशी यांनी उल्लेख केलेल्या स्पर्धेबाबत बोलताना मोदी म्हणाले, की "या स्पर्धेमध्ये हरल्यावर तुम्हाला नक्कीच वाईट वाटणार नाही."
नेटिझन्सचे सल्ले
दरम्यान, हिरोशी यांचे व्हिडिओ ट्विटरवर भरपूर व्हायरल होत आहेत. नेटिझन्स त्यांना विविध पदार्थ ट्राय करण्याचे सजेशन देत आहेत. तिखट वडापावनंतर त्यांना कोणी मँगो लस्सी ट्राय करण्याचा सल्ला देतंय, तर कोणी ताक पिण्याचा सल्ला देताना दिसून येतंय.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
