जुन्नरच्या बौद्ध लेण्या जागतिक पर्यटन स्थळ म्हणून विकसित करा

नवी दिल्ली : जुन्नर भागातील बौद्ध लेण्यांचा समूह देशाचा सांस्कृतिक ठेवा आहे. तो जतन होण्यासाठी त्याचा जागतिक पर्यटनस्थळ म्हणून विकास करा. त्यासाठी आवश्यक विकास निधी उपलब्ध करून द्यावा, अशी मागणी संसदेच्या अंदाज समितीचे अध्यक्ष, खासदार गिरीश बापट यांनी केंद्र सरकारकडे केली आहे. (Pune News)

खासदार बापट यांनी केंद्रीय संस्कृतिक आणि पर्यटन मंत्री जी. किशन रेड्डी यांची दिल्ली येथे भेट घेतली. पुणे जिल्ह्यातील जुन्नर परिसर, छत्रपती शिवाजी महाराजांचे जन्मस्थान असलेला शिवनेरी किल्ला, त्याबरोबरच पुरातन बौद्ध लेण्यांसंबंधी त्यांनी केंद्रीय मंत्र्यांना माहिती दिली. यावेळी समवेत डेक्कन कॉलेजचे माजी कुलगुरू डॉ. वसंत शिंदे, भाजपचे पुण्यातील चिटणीस सुनील माने होते.

बापट म्हणाले, "जुन्नर हे ऐतिहासिक आणि पौराणिक महत्त्व असलेले शहर आहे. सातवाहन काळात हा महत्त्वाचा परिसर होता. नाणेघाट ते पैठण हा सातवाहनकालीन व्यापारी मार्ग होता. म्हणूनच हा भाग, तेथील बौद्ध लेण्या या राष्ट्रीय आणि आंतरराष्ट्रीय पातळीवर पोहचविण्याची गरज आहे. त्यासाठी या परिसराला पर्यटनस्थळ म्हणून विकसित करावे लागेल. त्यासाठी निधीची मागणी केली आहे. नाणेघाटसाठी केंद्रीय पुरातत्व खात्याने विकास आराखडा तयार करण्यासाठी प्रयत्न सुरू आहेत."

जुन्नर परिसरात दोनशेच्यावर बौद्ध लेणी आहेत. त्या पाच समूहात विभागल्या गेल्या आहेत. हिनायन काळातील या लेण्या आहेत. त्यामुळे त्याचे पौराणिक महत्त्व खूप असल्याने त्याचा विकास झाला पाहिजे. तसेच शिवाजी महाराजांचे जन्मस्थान शिवनेरी किल्ल्याच्या विकासासाठी देखील निधीची मागणी केली असून, किल्ल्यावरील सातवाहनकालीन वारसा संग्रहालयासाठी निधी केंद्र सरकारने उपलब्ध करुन द्यावा, अशी मागणी केली असल्याचे त्यांनी सांगितले.

डॉ. शिंदे म्हणाले, "सातवाहन काळात नाणेघाट हा व्यापारी मार्ग होता. तो कल्याणला जोडला गेलेला होता. याबरोबरच परिसरातील बौद्ध लेण्यांचे जतन होण्याची गरज आहे. तो आपल्या संस्कृतीचा भाग आहे. त्याचा विकास केला, तर हा सर्वच परिसर पर्यटन‌ स्थळ म्हणून जागतिक नकाशावर येईल. यातून परिसरातचा आर्थिक विकासही साधला जाईल."