पुणे : कल्याणीनगरमधील अपघात प्रकरणानंतर अन्य शासकीय यंत्रणांप्रमाणे आरटीओ प्रशासनदेखील जागे झाले आहे. मोटारीची पुण्यात नोंदणी न झाल्याने वाहन क्रमांक मिळालेला नव्हता. विनानोंदणी व विनाक्रमांकाची ही मोटार शहरात धावत असल्याचे स्पष्ट झाल्यानंतर पुणे आरटीओ प्रशासनाने शहरातील सर्व दुचाकी व चारचाकी वाहन विक्रेत्यांना वाहनांची नोंदणी झाल्याशिवाय ग्राहकांकडे वाहन देऊ नका, असे पत्र पाठवले आहे. तसे न केल्यास कारवाई केली जाईल, असा इशाराही त्यांनी दिला.
मोटार वाहन कायद्यानुसार आता वाहनांची नोंदणी व वाहनांना दिला जाणारा क्रमांक याचे काम वाहन विक्रेत्यालाच करावे लागते. अनेकदा याचे पालन होते, तर काही वेळा वाहन विक्रेते ग्राहकांच्या दबावाला बळी पडून वाहनाच्या नोंदणीची प्रक्रिया पूर्ण न होताच वाहन ग्राहकाच्या ताब्यात देतात. पण आता असा प्रकार घडल्यास पुणे आरटीओकडून कारवाई केली जाऊ शकते. तशा आशयाचे पत्रच सर्व वाहन विक्रेत्यांना देण्यात आले आहे.
अपघातग्रस्त वाहनाची तपासणी
पुणे आरटीओच्या तीन मोटार वाहन निरीक्षकांनी अपघातग्रस्त मोटारीची तपासणी शुक्रवारी केली आहे. यात अपघात होण्यापूर्वी गाडीचा वेग किती होता, गाडीत काही तांत्रिक दोष निर्माण झाला होता का ? याची तपासणी केली आहे. ४ दिवसांत याचा अहवाल परिवहन विभागाकडून पोलिसांना सादर केला जाणार आहे.
वाहनाची नोंदणी न होताच वाहन ग्राहकांच्या हाती सुपूर्त करायचे नाही. याचे उल्लंघन झाल्यास कारवाईदेखील केली जाईल, असे पत्र पुणे आरटीओने शहरातील सर्व वाहन विक्रेत्यांना दिले आहे.
- संजीव भोर,
प्रादेशिक परिवहन अधिकारी (प्रभारी), पुणे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.