इंस्टाग्रामवर चॅटिंगचा बहाण्याने तरुणाचे अपहरण अन्‌ सुटका 

पिंपरी : इंस्टाग्रामवर तरुणासोबत चॅटिंगचा बहाणा करून तरुणीसह अकरा जणांनी तरुणाचे अपहरण केले व सोनसाखळी काढून घेतली. पोलिसांनी 24 तासांत तरुणाची सुटका करून सात जणांना ताब्यात घेतले. 

हिंजवडी ते देहूरोडदरम्यान बुधवारी (ता. 12) रात्री ही घटना घडली. सूरज संजय कोळी (वय 22, रा. मातृछाया बिल्डिंग, आकुर्डी) असे सुटका केलेल्या तरुणाचे नाव आहे. अभिजित ऊर्फ गणेश पुरी (वय 20, रा. रुपीनगर), वैभव उपाडे (वय 18, रा. परिवर्तन सोसायटी, घरकुल, चिखली), ऋतिक जाधव (वय 18, रा. संभाजीनगर, चिखली), गणेश ऊर्फ बाळी चव्हाण (वय 18), आनंद वाल्मीकी (वय 23), बाळासाहेब रोकडे (वय 22), रवींद्र भवाळ (वय 22, तिघेही रा. काळाखडक, वाकड) यांना पोलिसांनी ताब्यात घेतले. आदित्य कोडगी, शुभम वाळके, बाळा लोखंडे व एका तरुणीचा शोध सुरू आहे. 

पोलिसांनी दिलेल्या माहितीनुसार, किरकोळ कारणावरून सूरज याच्या अपहरणाचा डाव आरोपींनी आखला. त्यासाठी एका तरुणीच्या इंस्टाग्रामवरून चॅटिंग करून सूरजला रात्री नऊच्या सुमारास हिंजवडी येथे बोलाविले. तेथे त्याच्या दुचाकीला धक्का देऊन पाडल्यानंतर त्याची तीन तोळ्याची सोनसाखळी हिसकावली. तसेच पिस्तुलाचा धाक दाखवून दुचाकीवरून त्याचे अपहरण केले. मात्र, ही बाब पोलिसांना कळताच नाकाबंदीत त्याची देहूरोडमध्ये गुरुवारी (ता. 13) पहाटे साडेतीनच्या सुमारास सुटका करण्यात आली.