किरकटवाडी : डोणज्यात अल्पवयीन मुलीवर सामूहिक लैंगिक अत्याचार

किरकटवाडी : डोणजे (ता.हवेली) येथे पंधरा वर्षांच्या अल्पवयीन मुलीवर पाच तरुणांकडून सामुहिक लैंगिक अत्याचार (Rape) करण्यात आल्याची घटना घडली आहे. याप्रकरणी हवेली पोलीस ठाण्यात बाललैंगिक अत्याचार प्रतिबंधक कायद्यानुसार (पोस्को) गुन्हा दाखल करण्यात आला आहे. धक्कादायक म्हणजे दोनच दिवसांपूर्वी एका अल्पवयीन मुलावर लैंगिक अत्याचार केल्याप्रकरणी दाखल गुन्ह्यातील दोन आरोपींचा या गुन्ह्यातही सहभाग आहे.

निलेश नेटके (वय 21), लक्ष्मण पाटील (वय 22) व इतर तीन अल्पवयीन ( सर्व राहणार डोणजे ता. हवेली जि. पुणे) अशी गुन्हा दाखल झालेल्या आरोपींची नावे असून यातील निलेश नेटके हा अटक असून लक्ष्मण पाटील फरार झाला आहे. दोन दिवसांत दोन वेळा बाललैंगिक अत्याचार प्रतिबंधक कायद्यानुसार गुन्हा दाखल झाल्याने डोणजे परिसरातील पालक व शिक्षकांनी चिंता व्यक्त केली आहे.

हवेली पोलीसांनी दिलेल्या माहितीनुसार आरोपींनी पंधरा वर्षांच्या अल्पवयीन मुलीवर जबरदस्तीने लैंगिक अत्याचार करुन त्याचे व्हिडिओ तयार केले. घडलेल्या प्रकाराबाबत वाच्यता केल्यास व्हीडिओ व्हायरल करण्याची धमकी दिली. घाबरलेल्या मुलीला व तिच्या आईला महिला पोलीस अधिकाऱ्यांनी विश्वासात घेतल्यानंतर पीडीत मुलीने याबाबत माहिती दिली. त्यानुसार हवेली पोलीस ठाण्यात गुन्हा दाखल करण्यात आला असून सहाय्यक पोलीस निरीक्षक नितीन नम याबाबत अधिक तपास करत आहेत.

"पहिल्या पोस्कोच्या गुन्ह्यातील काही विकृत आरोपी या गंभीर गुन्ह्यातही सहभागी आहेत. या गुन्ह्याचा सखोल तपास करण्यात येणार असून आणखी काही नावे समोर येण्याची शक्यता आहे. असे लज्जास्पद व विकृत कृत्य यापुढे कोणी करणार नाही यासाठी आरोपींना कठोर शिक्षा व्हावी असा प्रयत्न याप्रकरणी करण्यात येणार आहे. असे काही घडत असल्यास कोणतीही भीती न बाळगता हवेली पोलीस ठाण्याशी संपर्क साधावा." सदाशिव शेलार, पोलीस निरीक्षक, हवेली पोलीस ठाणे, पुणे ग्रामीण.