Baramati News : बारामती विमानतळानजिक शिकाऊ विमानाचा अपघात

बारामती - येथील विमानतळानजिक रेड बर्ड या कंपनीचे शिकाऊ विमान गुरुवारी (ता. 19) संध्याकाळी कोसळून अपघात झाला. सुदैवाने या अपघातात कोणतीही प्राणहानी झाली नसल्याची माहिती पोलिसांनी दिली आहे.

दुपारच्या सुमारास लँडीग करत असताना हा अपघात झाल्याची प्राथमिक माहिती मिळत आहे. या अपघातात एक पायलट किरकोळ जखमी झाला आहे. या घटनेनंतर पोलिसांनी घटनास्थळी धाव घेतली.

हा अपघात नेमका कशामुळे झाला हे अजून स्पष्ट झालेले नाही. विमानतळाच्या हद्दीतच विमान कोसळल्याने इतर कोणतीही दुर्घटना घडली नाही. या अपघातात विमानाचे ब-यापैकी नुकसान झालेले आहे. पोलिसांनी घटनास्थळाचा पंचनामा केला आहे. या संदर्भात पोलिसांनी माहिती गोळा करण्यास प्रारंभ केला असून अपघाताच्या कारणाचीही चौकशी केली जात आहे.