रक्षाबंधनासाठी माहेरी गेलेल्या महिलेवर बिबट्याचा हल्ला

मांडवगण फराटा : वडगाव रासाई (ता. शिरुर) येथील साखराई मळा येथे रक्षाबंधनासाठी (Rakshabandhan) माहेरी आलेल्या महिलेवर बिबट्याने प्राणघातक हल्ला (Leopard attack) करुन जखमी केले आहे. दैव बलवत्तर असल्याने महिलेचे प्राण वाचले आहेत.

रक्षाबंधनाच्या निमित्ताने आपल्या भावाला राखी बांधण्यासाठी मांडवगण फराटा येथील राणी युवराज घाडगे (वय- ४२ वर्षे) या आपल्या माहेरी वडगाव रासाई येथे गेल्या होत्या. रक्षाबंधन कार्यक्रम उरकुन त्या आपल्या मुलासह सासरी घरी जाण्यासाठी रविवारी रात्री साडे आठच्या सुमारास निघाल्या होत्या. यावेळी बिबट्याने त्यांच्या दुचाकीवर झडप घालुन राणी यांच्यावर जीवघेणा हल्ला केला. यात त्यांच्या हाताला बिबट्याचे दात तर कमरेला पंजाची नखे लागून त्या जखमी झाल्या आहेत. मांडवगण फराटा येथील प्राथमिक आरोग्य केंद्रात त्यांच्यावर उपचार करण्यात आले आहेत. या भागात आजपर्यंत बिबट्याने गाई, वासरे, शेळ्या, पाळीव कुत्री, रान डुक्कर, ससे यांसारख्या प्राण्यांवर हल्ले केले होते परंतु माणसांवर हल्ला केल्याने या परिसरात भीतीचे वातावरण निर्माण झाले आहे. हा बिबट्या नरभक्षक होण्याची शक्यता नाकारता येत नाही.

यावेळी शिरुरचे वनपरिक्षेत्र अधिकारी मनोहर म्हसेकर, वनपरिमंडळ अधिकारी पी. ए. क्षीरसागर, वनरक्षक एस. जे. पावणे, एस. एम. जराड, वनसेवक एन. बी. गांधले, एस. बी. शितोळे यांनी घटनास्थळी धाव घेत पाहणी केली. वनविभाग या हल्लेखोर बिबट्याला पकडण्यासाठी पिंजरा लावणार असल्याचे सांगण्यात आले.