नारायणगाव - आठवर्षीय मुलावर हल्ला करणाऱ्या तेजेवाडी (ता. जुन्नर) येथील नरभक्षक बिबट्याला आज सायंकाळी सात वाजण्याच्या सुमारास जेरबंद करण्यात वनविभागाला यश आले आहे. हा बिबट्या नर जातीचा असून पूर्ण वाढ झालेला आहे. बिबट्याला माणिकडोह येथील निवारा केंद्रात हलवण्यात आले आहे. अशी माहिती नारायणगाव विभागाचे वनरक्षक ज्ञानेश्वर पवार यांनी दिली.
आज पहाटे पाच वाजण्याच्या सुमारास बिबट्याने केलेल्या हल्ल्यात रुपेश तान्हाजी जाधव (वय-9) हा मुलगा ठार झाला होता. रुपेश आज पहाटे पाच वाजता घराजवळील सोयाबीनच्या शेतात प्रातः विधीसाठी गेला होता. यावेळी त्याच्यासोबत आजोबा होते. उसाच्या शेतात दबा धरून बसलेल्या बिबट्याने रुपेश याच्यावर हल्ला केला. आज सकाळी त्याचा मृतदेह उसाच्या शेतात आढळून आला.
एप्रिल महिन्यात याच भागातील शिरोली बुद्रुक येथे बिबट्याच्या हल्ल्यात मेंढपाळाची तीन वर्षाची मुलगी मृत झाली होती. पाच महिन्यात या भागात बिबट्याच्या हल्ल्यात दोन जणांचा मृत्यू झाल्याने नागरिकांमध्ये भीतीचे व संतापाचे वातावरण पसरले असून बिबट्याचा कायमस्वरूपी बंदोबस्त करण्याची मागणी केली जात आहे.
या घटनेचे गांभीर्य ओळखून नरभक्षक बिबट्याला जेरबंद करण्यासाठी उपवनसंरक्षक अमोल सातपुते, वनपरिक्षेत्र अधिकारी प्रदीप चव्हाण यांच्या मार्गदर्शनाखाली घटनास्थळ परिसरात आज सायंकाळी नऊ पिंजरे लावण्यात आले होते. पिंजऱ्यात कोंबडी भक्ष म्हणून ठेवण्यात आली होती. आज सायंकाळी सात वाजण्याच्या सुमारास नरभक्षक बिबट्या पिंजऱ्यात अडकला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.