एल अँड टीच्या सीएसआर निधीमुळे भुकूमच्या शाळेचा कायापालट

बावधन : एल अॅड टी कंपनीने आपल्या सीएसआर निधीतून भुकूम येथील जिल्हा परिषद शाळेची रंगरंगोटी आणि सभागृहाचे शेड बांधले आहे. कंपनीच्या सहकार्यामुळे शाळेच्या इमारतीचा कायापालट झाला असून येथील भिंतीही आता बोलक्या झाल्या आहेत.

शाळेतील उपशिक्षिका विनिता बारवे यांनी ग्रामपंचायतीचे लोकप्रतिनीधी, शालेय शिक्षण समितीचे पदाधिकारी यांच्या सहकार्याने एल अॅंड टी कंपनीच्या अधिकाऱ्यांची भेट घेवून शाळा इमारतीच्या रंगरंगोटीबाबतचे आवाहन केले. कंपनीच्या अधिकाऱ्यांनीही त्यास सकारात्मक प्रतिसाद दिला. त्यांनी वर्गखोल्यांसह संपूर्ण इमारतीची रंगरंगोटी केली. इमारतीच्या टेरेसवर शेड बांधून सभागृहाची सुविधा उपलब्ध करून दिली. भिंतीवर वेगवेगळी चित्रे काढली. यामुळे संपूर्ण शाळेचे रूपडेच बदलले. तसेच रंगीत चिंत्रांमुळे भिंतीही बोलक्या झाल्या.

या इमारतीचा लोकार्पण सोहळा झाला. यावेळी कंपनीचे हेड ऑफ वेस्ट व्हिजन आत्माराम मगर, उपसभापती विजय केदारी, जिल्हा परिषद सदस्य शंकर मांडेकर, राष्ट्रवादीचे तालुका अध्यक्ष महादेव कोंढरे, गटशिक्षणाधिकारी माणिक बांगर, माजी सरपंच नामदेव माझिरे, सरपंच रेखा वाघ, उपसरपंच सचिन आंग्रे, मुख्याध्यापक बाळू लबडे, भारती खोपडे, विनिता बारवे, सुरेखा विश्वासराव, संगीता गव्हाणे, शिवाजी पवार, रोहिणी गवळी, प्रवीण हगवणे, अतुल पवार, शारदा ननावरे, विनोद ननावरे, विजय ननावरे, शुभांगी माझीरे, दिपाली माझीरे, पूजा मोडक, शिवाजी जाधव, अश्विनी ननावरे, ग्रामसेवक भागवत यादव, ग्रामपंचायत सदस्य व ग्रामस्थ उपस्थित होते.