तलाठीपदाची परीक्षा देण्यासाठी निघालेली युवती टेम्पोच्या धडकेत जागीच ठार; मुंबई-बंगळुर महामार्गावर भीषण अपघात

कर्वेनगर : वारजे माळवाडी लगत असलेल्या हिंदुस्थान पेट्रोलियम पंपासमोर (Hindustan Petroleum Pump) मुंबई-बंगळुर महामार्गावर (Mumbai-Bangalore Highway) पहाटे साडेपाच वाजता टेम्पो ट्रॅव्हलच्या धडकेत जयश्री वसंता जाधव (वय 24, रा. जोडगाव, ता. मालेगाव जि. वाशिम) या युवतीचा मृत्यू झाला आहे.

हा अपघात इतका भयानक होता की, रस्त्यावर मांस विखुरले होते असं प्रत्यक्षदर्शींनी सांगितलं. जयश्री आणि तिचे वडील, भाऊ हे एकाच दुचाकी वाहनांवर होते. शिवणेतील एका काॅलेजवर जयश्री तलाठी पदाची परीक्षा देण्यासाठी एका विद्यालयात जात असताना हा भीषण अपघात झाला आहे.

वारजे पोलिसांनी (Warje Police) दिलेल्या माहितीनुसार, पहाटे एका खड्ड्यात त्यांचे दुचाकी वाहन आदळले आणि जयश्री तिघांत सर्वात मागे बसली होती. दुचाकी आदळली, तेव्हा जयश्री रस्त्याच्या उजव्या बाजूला पडली आणि जोरात येणाऱ्या टेम्पो ट्रॅव्हलने जयश्रीला जोराची धडक दिली, त्यामुळे तिचा जागेवरच मृत्यू झाला. याबाबतचा अधिक तपास पोलिस करत आहेत.