Manoj Jarange: "...तर लायकी नसलेल्याच्या हाताखाली कामाची वेळ आली नसती"; खराडीतल्या सभेत जरांगेंचं विधान

पुणे : मराठा आरक्षणासाठी मनोज जरांगेंची पुण्यातील खराडी इथं सभा पार पडली. यावेळी त्यांनी मराठा समाजाला आरक्षणाची गरज का आहे? हे सांगताना काही अशी विधानं केली आहेत ज्यामुळं वाद निर्माण होण्याची शक्यता आहे. आरक्षण आधीच मिळालं असतं तर ज्याची लायकी नाही त्याच्या हाताखाली काम करायची वेळ आली नसती, असं जरांगेंनी म्हटलं आहे. (Manoj Jarange controvarsal statement during Kharadi rally for Maratha Reservation)

ज्याची लायकी नाही त्याच्या हाताखील काम

जरांगे म्हणाले, ९५ टक्के पडले तरी, मराठ्याचं लेकरु घरी राहिलं, त्याला नोकरी मिळाली नाही. हेच आरक्षण ७० वर्षांपूर्वी मिळालं असतं तर, मराठा जात जगात एक नंबरवर राहिली असती. ज्याची लायकी नाही त्याच्या हाताखाली काम करायची वेळ आली नसती. आरक्षणापायी आमच्या मुलांचे मुडदे पडायला लागले आहेत, त्यामुळं आता सरकारला सुट्टी नाही. (Marathi Tajya Batmya)

बेकायदापद्धतीनं पोटजाती घुसवल्या

कायदा सांगतो लोकसंख्येच्या प्रमाणात ५० टक्के आरक्षण दिलं पाहिजे. मंडल आयोगानं ओबीसींना १४ टक्के आरक्षण दिलं, म्हणजे ओबीसी २८ टक्के आहेत. हे आम्ही नाही ठरवलं ते मंडल आयोगानं ठरवलं. सन १९९४ मध्ये हे आरक्षण ३० टक्के झालं. म्हणजे ओबीसी ६० टक्के झालं. यात बेकायदा पद्धतीनं पोटजाती घुसवण्यात आल्या. (Latest Marathi News)

मराठ्यांनी कधीच जातीयवाद नाही केला - जरांगे

माझ्या मराठा समाजासमोर कोणत्याही जातीचा माणूस आला तरी त्याच्यातली माणुसकी जिवंत व्हायची. त्यानं कधीच कोणाची जात शोधली नाही. जे आपल्या हातात आणि पदरात आहे ते मोठ्या मनानं देण्याचं काम माझ्या बापजाद्यांनी केलं. प्रत्येकाच्या सुखादुखात माझा बापजादा धावून गेला. कोणावरही अन्याय झाला पाहिजे हे त्यांनी बघितलं. स्वतःच्या लेकराला एक वेळाचं दिलं नाही पण दुसऱ्याचं लेकरु उघड्यावर पडू दिलं नाही. त्याच्यावर मायेचं छत्र पडू दिलं नाही. जात ही माझ्या बापजाद्या मराठ्यांना कधी शिवली नाही.

स्वतःच्या हक्काचं आरक्षण असतानाही दुसऱ्याला दिलं. कधी समाज असं म्हटला नाही की माझ्या लेकराच्या डोळ्यातही कधी पाणी येईल त्यामुळं तुम्ही घेऊ नका असं कधी म्हटलं नाही. माझ्या लेकरांना वेळ आल्यावर धाऊन येतील यासाठी मराठ्यांनी सर्वांना मदत केली.