Pune : भय इथले संपत नाही, वाचा आंबेगाव तालुक्यात बिबट्यांची संख्या किती?

Ambegaon News: येथील बिघेवस्ती काटवानवस्तीत वनविभागाने लावलेल्या पिंजऱ्यात रविवार(ता.२५) पहाटे एक वर्षाची बिबट मादी जेरबंद झाली,याच वस्तीवर अवघ्या १४ दिवसात सलग तिसरा बिबट्या जेरबंद होण्याची वेळ आहे,अजुनही काटवानवस्ती,बिघे वस्तीत बिबट्यांचा वावर असून बिबट्याचे भय काही संपत नसल्याचे चित्र असून नागरिकांमध्ये घबराटीचे वातावरण पसरले आहे.

वळती येथील काटवानवस्ती,बिघेमळ्यात अवघ्या १४ दिवसात रविवारी पकडलेला हा तिसरा बिबट्या ठरला आहे १२ ऑगस्ट रोजी पहाटेच्या सुमारास पहिला बिबट्या जेरबंद झाला त्यानंतर १८ ऑगस्ट रोजी दुसरा बिबट्या हा एक वर्षाचा नर जातीचा होता त्यानंतर देखील या परिसरात बिबट्याचा वावर असल्याने शेतकरी मारुती कारभारी भोर यांनी वनविभागाला पिंजरा पुन्हा लावण्याची मागणी केली होती.

त्यानंतर रविवार (ता.२५) रोजी पहाटे चार वाजण्याच्या सुमारास पुन्हा तिसरी एक वर्षाची बिबट मादी जेरबंद झाली,पकडलेली ही मादी असून खूपच आक्रमक आहे.रविवारी सकाळी वनविभागाच्या अधिकारी,कर्मचाऱ्यांसह व वनविभागाच्या रेस्क्यू पथकाने बिबट मादीला ताब्यात घेतले

बिघे मळ्यात संतोष पाटीलबुवा लोखंडे यांच्या दोन मेंढ्या बिबट्याने रविवारी मध्यरात्री ठार केल्या असून या परिसरात अजूनही बिबट्यांचा वावर असल्याचे स्थानिक शेतकरी मारुती भोर यांनी सांगितले आहे त्यामुळे बिबट्याचे भय अजून संपत नसल्याचे चित्र आहे तरी वनविभागाने येथे पुन्हा पिंजरा लावावा अशी मागणी नागरिकांनी केली आहे.