लॉकडाउनमुळे रखडली म्हाडाची 'लॉटरी'; पाहा कधी होणार सोडत!

पुणे : गृहनिर्माण व क्षेत्रविकास मंडळाच्या (म्हाडा) पुणे विभागाकडून म्हाडाच्या सुमारे 4 हजार 800 सदनिकांसाठी सोडत निघणार आहे. मात्र, परिस्थिती पूर्ववत होईपर्यंत नागरिकांना म्हाडाच्या घरासाठी वाट पाहावी लागणार आहे. पुणे विभागातील पुणे, पिंपरी-चिंचवड, सोलापूर, कोल्हापूर आणि सांगली येथे 4 हजार 800 सदनिका उपलब्ध होणार आहेत. त्यापैकी सुमारे चार हजार सदनिका पुणे, पिंपरी चिंचवड परिसरात असतील.

- रविवारपासून पुणेकरांना दिलासा! लॉकडाउनच्या दुसऱ्या टप्प्यात 'ही' दुकाने राहणार सुरू!​

म्हाडाच्या पुणे विभागाने पुणे व पिंपरी चिंचवड महापालिका हद्दीतील विविध ठिकाणी बांधलेल्या 2 हजार 190 सदनिकांसाठी गेल्या 13 सप्टेंबर रोजी जाहिरात प्रसिद्ध केली होती. त्यानुसार 19 नोव्हेंबर रोजी ऑनलाइन सोडत काढण्यात आली. यामध्ये तळेगाव दाभाडे, म्हाळुंगे, चाकण तळेगाव, पिंपरी वाघिरे, धायरी, धानोरी, खराडी, येवलेवाडी, बिबवेवाडी, वाकड, चिखली अशा विविध भागात सदनिकांसाठी सोडत काढण्यात आली होती.

या सोडतीमध्ये अर्ज केलेल्या नागरीकांसाठी पुन्हा जानेवारी महिन्यात सोडत काढण्यात येणार होती. परंतु मार्च महिन्यात कोरोनाचा संसर्ग सुरू झाल्यामुळे लॉकडाऊन जाहीर करण्यात आला. त्यामुळे कार्यालयात कर्मचाऱ्यांची पुरेशा प्रमाणात उपस्थिती नाही. त्याचा परिणाम म्हाडाच्या सदनिकांच्या ऑनलाईन सोडतीवर झाला आहे.

- 'जिओ चॅट' ठरणार विद्यार्थ्यांसाठी दुवा; व्हर्च्युअल शिक्षणाच्या दिशेने आणखी एक पाऊल!

दरम्यान, सुमारे अकरा महिन्यांपासून म्हाडाची सोडत न झाल्यामुळे यापुढे उपलब्ध होणाऱ्या सदनिकांमध्ये वाढ होईल, अशी शक्यता आहे. लॉकडाऊनचा परिणाम बांधकाम क्षेत्रावर झाल्यामुळे म्हाडाला उपलब्ध होणाऱ्या सदनिकांवरही परिणाम होणार असल्याचे म्हाडाकडून सांगण्यात आले.

- ताज्या बातम्यांसाठी डाऊनलोड करा ई-सकाळचे ऍप

कोरोना प्रादुर्भावामुळे बांधकाम क्षेत्रावर परिणाम झाला आहे. तसेच, कार्यालयीन कामकाजही पूर्ण क्षमतेने होत नाही. परिस्थिती सामान्य झाल्यानंतर ऑनलाइन सोडत प्रक्रियेला किमान एक महिन्याचा कालावधी लागेल. त्यानंतर म्हाडाकडून ऑनलाईन सोडत काढण्यात येईल.
- अशोक पाटील, मुख्य अधिकारी, म्हाडा, पुणे

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)