एमएनजीएलच्या घरगुती पाईप्ड गॅसच्या किमतीत दोन रुपयांची दर कपात

पुणे - सीएनजीच्या दरात चार रुपयांचा कपात केल्यानंतर महाराष्ट्र नॅचरल गॅस लिमिटेड (एमएनजीएल) या शहरी भागांतील गॅस वितरण कंपनीने आता घरगुती वापराच्या पाईप्ड गॅसच्या (पीएनजी) किरकोळ विक्री किमतीत दोन रुपयांची कपात केली आहे. त्यामुळे पीएनजीचे दर ५१. ५० प्रति एससीएमवरून (स्टॅन्डड् क्यूबिक मीटर) ४९.५० प्रति एससीएम झाले आहेत. ही दरकपात बुधवारी (ता. १७) मध्यरात्रीपासून लागू होईल.

नैसर्गिक वायूच्या खरेदी किमतीत घट झाल्याने पीएनजीच्या दरात ही कपात करण्यात आली आहे. कमी झालेल्या गॅसच्या किमतीचा फायदा ग्राहकांना देण्याचा निर्णय घेतला आहे, असे एमएनजीएलकडून सांगण्यात आले. पुणे, पिंपरी-चिंचवड, हिंजवडी, चाकण व तळेगाव या भागांत किमतीत कपात करण्यात आली आहे.

दर कमी केल्याने अनेक ग्राहकांना त्याचा फायदा होणार आहे. शिवाय एलपीजी सिलिंडरच्या सध्याच्या किमतीच्या तुलनेत सुमारे १६ टक्के बचत होईल. गेल्या काही दिवसांपासून सतत दरवाढीचे चटके सहन करीत असलेल्या सीएनजीच्या वापरकर्त्या वाहन चालकांना एमएनजीएलने मंगळवारी दिलासा दिला होता. कंपनीकडून पुणे आणि पिंपरी-चिंचवड शहरात सीएनजीचा दर चार रुपयांनी कमी करण्यात आला आहे. तर दुसऱ्याच दिवशी घरगुती वापराच्या पाईप्ड गॅसच्या किरकोळ विक्री किमतीत देखील कपात केली आहे.