आदिवासी महिलांनी उभारली सुधारीत देशी जातीच्या कोंबड्यांची आधुनिक पोल्ट्री

मंचर - डिंभे खुर्द (ता.आंबेगाव) येथील दया किसन केंगले व इतर एकूण ३५ लाभार्थी आदिवासी महिलांना विशेष केंद्रीय सहाय्य योजने अंतर्गत अंड्यावरील व मांसल देशी कुक्कुट पक्ष्यांचे बॅक यार्ड पोल्ट्रीसाठी २४ लाख ९९ हजार ९८० रुपये अनुदान हस्तांतरण करण्यात आले. ३१ लाख २५ हजार १५० रुपयांचा हा प्रकल्प आहे. महिलांना हक्काचा रोजगार मिळणार असल्याची माहिती घोडेगाव (ता.आंबेगाव) येथील एकात्मिक आदिवासी विकास सहाय्यक प्रकल्प अधिकारी कैलास खेडकर यांनी दिली.

डिंभे खुर्द येथे पोल्ट्री शेडची पाहणी केल्यानंतर अनुदान रक्कम धनादेश खेडकर यांच्या हस्ते देण्यात आला. त्यापैकी सहा लाख २५ हजार १७० रुपये (२० टक्के) रक्कम लाभार्थी महिलांनी भरली. सुधारित देशी जातीच्या आठ आठवडे वयाच्या १०० तलंगा व १२ नर कुक्कुट पक्षी खरेदी केले असून प्रशस्त शेड उभारण्यात आले आहे. यावेळी निरीक्षक मुनेश्वर व सह्याद्री इंडस्ट्रीज लिमिटेड पुणे प्रतिनिधी दत्तात्रय दौंडकर, वास्तू विशारद मयूर दोशी, सागर मसुरेकर,ओंकार मोरडे व सर्व लाभार्थी उपस्थित होते. दया केंगले यांनी आभार मानले.

“ घोडेगाव येथील एकात्मिक आदिवासी विकास प्रकल्पामार्फत महिला सक्षमीकरण करण्यासाठी अनेक योजनांची प्रभावीपणे अमलबजावणी केली जाते. कुक्कुटपालनातून महिलांना खात्रीशीर आर्थिक उत्पन्न मिळते. सह्याद्री इंडस्ट्रीज लिमिटेड पुणे यांनी उत्कृष्ठ आत्याधुनिक बॅक यार्ड पोल्ट्री शेल्टर तयार केले आहे. याचा फायदा महिलांना होणार आहे. ही योजना विस्तृत स्वरूपात अधिकारी वर्गाने राबवली आहे.”

- कैलास खेडकर, एकात्मिक आदिवासी विकास सहाय्यक प्रकल्प अधिकारी, घोडेगाव (ता.आंबेगाव).