पुणे : कोरोना बाधित ८० टक्क्यांहून अधिक रुग्णांचे घरीच विलगीकरण

पुणे : शहरातील कोरोनाच्या सक्रिय बाधित रुग्णांपैकी ८० टक्क्यांहून अधिक रुग्णांना सौम्य लक्षणे आहेत. त्यामुळे ते घरीच विलगीकरणात आहेत. तर ७३ गंभीर रुग्णांवर उपचार सुरू आहेत. ओमिक्रॉनच्या रुग्णांमध्ये सौम्य लक्षणे दिसत आहेत. त्यामुळे घाबरून जाण्याचे कारण नाही, अशी माहिती महापालिकेचे आरोग्यप्रमुख डॉ. आशिष भारती यांनी बुधवारी (ता. ५) दिली. (pune corona news update)

गेल्या काही दिवसात कोरोनाबाधितांची संख्या वाढते आहे. त्यामुळे घाबरून न जाता नागरिकांनी कोरोना प्रतिबंधक नियमांचे काटेकोरपणे पालन करणे आवश्यक आहे, असे डॉ. भारती यांनी सांगितले. तर कोरोनाबाधितांची संख्या पुन्हा वाढत आहे. या पार्श्वभूमीवर महापालिकेने बाधितांच्या संपर्कातील व्यक्तींचा शोध घेऊन (कॉन्टॅक्ट ट्रेसिंग) त्यांच्या चाचण्यांमध्ये वाढ केली आहे. त्याचबरोबर नागरिकही स्वत:हून चाचणी करण्यासाठी येत आहेत. त्यामुळे चाचण्यांमध्ये वाढ झाली आहे. लसीकरण न झालेल्यांचे लसीकरण त्वरित पूर्ण करण्यासाठी प्रयत्न सुरू आहे. सध्या एक लाख ९१ हजार नागरिकांचा दुसरा डोस पूर्ण होणे बाकी आहे, अशी माहिती महापालिकेचे सहायक आरोग्यप्रमुख डॉ. संजीव वावरे यांनी दिली.