मांजरी बुद्रुक येथील मुळा- मुठा नदीवरील पूल पाण्याखाली

मांजरी - गेली तीन दिवसांपासून सुरू असलेली पावसाची संततधार आणि खडकवासला धरणातून करण्यात आलेला विसर्ग यामुळे मुळा- मुठा नदीच्या पाण्याची पातळी वाढली आहे. येथील मांजरी-वाघोली रस्त्याला जोडणारा नदीवरील पूल या पाण्याखाली गेला असून त्यावरील वाहतूक जिल्हा प्रशासनाकडून बंद करण्यात आली आहे. प्रशासनाने प्रवाशांना पर्यायी मार्ग वापरण्याचे आवाहन केले आहे.

तीन दिवसांपासून मुळा-मुठा नदीत धरणातून पाणी सोडले जात आहे. हळू-हळू पाण्याची पातळी वाढत जाऊन अखेर आज सायंकाळी साडेचार वाजता येथील पुलावरून पाणी वाहण्यास सुरुवात झाली. त्यामुळे मांजरी बुद्रुक व मांजरी खुर्द या दोन्ही गावांचा संपर्क तुटला आहे.

दुपारनंतर पाणी वाढू लागले असतानाही प्रशासनाने कोणतीही खबरदारी घेतली नव्हती. थेट पुलावरून पाणी वाहत असतानाही दोन्ही बाजूने प्रवासी धोकादायकपणे पूल ओलांडत होते. मांजरी खुर्द येथील कार्यकर्ते अशोक आव्हाळे प्रवाशांना सांगूनही ते ऐकत नसल्याने आव्हाळे यांनी शंभर क्रमांकावर संपर्क साधून धोक्याची सूचना दिली. त्यानंतर हडपसर व लोणीकंद पोलीसांनी येऊन पुलावरील वाहतूक बंद केली.

दरम्यान, याठिकाणी दोन्हीही बाजूने पोलीस बंदोबस्त लावण्यात आला आहे. सार्वजनिक बांधकाम विभागाकडूनही कर्मचारी नियुक्त करण्यात आले आहेत. पोलिसांनी पूलावरील वाहतूक बंद करून नागरिकांना पर्यायी मार्गाचा वापर करण्याची सूचना दिली आहे.