स्पर्धा परीक्षांसाठी नवा ‘मुळशी पॅटर्न’

पिरंगुट - आम्हीच आमच्या भविष्याचे शिल्पकार असून, एकमेकांच्या सहकार्यामुळेच आम्ही आमच्या यशाचा मार्ग सुकर करू, या जाणिवेने पिरंगुट (ता. मुळशी) येथील तुळजाभवानी टेकडीवर तरुणाईचे हात राबत आहेत. सरकारी नोकरी मिळवायची आणि मुळशीचा नवा पॅटर्न तयार करायचा, या एकाच ध्येयाने प्रेरित झालेल्या या तरुणाईने कामाला सुरुवात केली आहे. तेही ‘एकमेका साह्य करू, अवघे धरू सुपंथ’ हे ब्रीदवाक्‍य समोर ठेवून.

- ताज्या बातम्यांसाठी डाऊनलोड करा ई-सकाळचे ऍप

पिरंगुट येथील तुळजाभवानी ट्रस्टच्या सहकार्याने येथील टेकडीवरील शक्तीचे प्रतीक असलेल्या देवीच्या मंदिरालगतच मोफत पोलिस भरती मार्गदर्शन केंद्र आणि स्पर्धा परीक्षा मार्गदर्शन केंद्र सुरू झालेले आहे. युवकांनीच युवकांसाठी लोकसहभागातून सुरू केलेल्या या केंद्रात सध्या पन्नासहून अधिक युवक-युवती मार्गदर्शन घेत आहेत. त्यात पोलिस, महसूल, कृषी, सहकार तर कुणाला सैनिकी क्षेत्रातही जाऊन सामाजिक बांधिलकी जोपासायची आहे. या केंद्रांमध्ये प्रशासन सेवेत जाण्यासाठीचे मार्गदर्शन केले जाते. त्यातूनच प्रियांका मदने ही पुणे शहर, प्रशांत निंबाळकर हा मुंबई शहर पोलिसांत रुजू झालेत.

- पुण्याच्या बातम्या वाचण्यासाठी येथे ► क्लिक करा

अजय काळे हा महाराष्ट्र राज्य परिवहन मंडळामध्ये रुजू झाला. शुभम धनवे या तरुणालाही नोकरी मिळाली. संतोष भूमकर हा तरुण पोलिस उपनिरीक्षक पदावर कार्यरत असून तन मन धनाने या केंद्रासाठी सहकार्य करीत आहे.  हॉल उभारणीसाठी मदतीचा ओघ सुरू असूनही केंद्रातील प्रत्येक तरुण-तरुणी स्वतः श्रमदान करत आहेत. शुभम धनवे व प्रियंका मदने म्हणाले की, आम्हाला २०२३ पर्यंत पीएसआय होण्यासाठी या अभ्यासिकेचा फायदा होणार असल्याने श्रमदान करीत आहोत. 

असा आहे उपक्रम

• या केंद्राला ‘आदिशक्ती प्रेरणा केंद्र’ नाव दिले आहे
• याच केंद्रातून मार्गदर्शन घेऊन पोलिस उपनिरीक्षक परीक्षेमध्ये निवड झालेल्या दोघांकडून मोफत मार्गदर्शन
• एकत्र येऊन मैदान तयार करण्याचे काम
• ट्रस्टच्या माध्यमातून पंधराशे चौरस फुटांचे बांधकाम करून अभ्यासिकेसाठी हॉल उभारण्यात येत आहे
• सध्या या केंद्रात पंधरा मुली व पस्तीस मुले सराव करतात
• अभ्यासिकेत स्पर्धा परीक्षेची पुस्तके व व्याख्यानांची व्यवस्था,  ऑनलाइन मार्गदर्शन सुविधा उपलब्ध होणार आहे

Edited By - Prashant Patil