पुणे - जिल्हा परिषदेच्या आरोग्य विभागाच्या वतीने हिवाळ्याच्या पार्श्‍वभूमीवर जिल्ह्यातील प्राथमिक आरोग्य केंद्रांमध्ये श्‍वानदंश आणि सर्पदंश प्रतिबंधक लसीचा पुरेसा साठा उपलब्ध करून दिला आहे. यामुळे आता प्राथमिक आरोग्य केंद्रात सर्पदंश आणि श्‍वानदंशावर उपचार उपलब्ध होणार आहेत.
हिवाळ्यात निर्माण होणाऱ्या दमट, उष्ण आणि थंडीच्या वातावरणामुळे बिळांतून बाहेर पडणाऱ्या सापांचे प्रमाण वाढते. तसेच, जिल्ह्यात भटक्‍या कुत्र्यांचे प्रमाणही वाढले आहे. यामुळे श्‍वान आणि सर्पदंश वाढण्याची शक्‍यता गृहीत धरून जिल्हा परिषदेच्या आरोग्य विभागाकडून आवश्‍यक खबरदारी घेण्यात येत आहे.
श्‍वान दंश झालेल्या व्यक्तीला ‘रेबीज’ होण्याचा धोका असतो. बारामती तालुक्‍यातील एका महिलेचा नुकताच यामुळे मृत्यू झाला. सर्पदंशामुळे अनेकदा रुग्ण दगावण्याची शक्‍यता असते. यावरील लसींसाठी खासगी दवाखान्यांमध्ये वारेमाप पैसे मोजावे लागतात. परिणामी, अनेक गरीब रुग्णांमध्ये खासगी दवाखान्यात उपचार घेण्याची कुवतही नसते. या पार्श्‍वभूमीवर जिल्हा परिषदेने सर्व प्राथमिक आरोग्य केंद्रांमध्ये या लस उपलब्ध करून देण्याचा निर्णय घेतला आहे.
जिल्ह्यात ९६ प्राथमिक आरोग्य केंद्रे आहेत. यामध्ये श्‍वानदंशाच्या एकूण नऊ हजार ३९३ आणि सर्पदंशाच्या १४ हजार ९३७ लसींचा पुरवठा केला आहे. ऐनवेळी कोणीही या लसीपासून वंचित राहू नये, यासाठी जिल्हा आरोग्य विभागाकडेही लसींचा राखीव साठा ठेवण्यात आला आहे. आरोग्य विभागाकडेही श्‍वानदंशाच्या तीन हजार २०२ आणि सर्पदंशाच्या सात हजार ७७९२ लसींचा साठा उपलब्ध आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.