शिकतानाच कमविण्याची सनदी लेखापालांना संधी

मार्केट यार्ड : सनदी लेखापालाचे (सीए) शिक्षण घेत असतानाच विद्यार्थ्यांना रोजगार मिळावा तसेच त्यांच्यातील कौशल्याचा विकास व्हावा, यासाठी दि इन्स्टिट्यूट ऑफ चार्टर्ड अकाउंटंट्स ऑफ इंडियातर्फे (आयसीएआय) ‘ट्रेन, अर्न अँड लर्न’ (टेल) हा उपक्रम राबविण्यात येणार आहे. याबाबत ‘आयसीएआय’च्या वेस्टर्न इंडिया रिजनल कौन्सिलचे (डब्ल्यूआयआरसी) अध्यक्ष सीए मनीष गादिया यांनी माहिती दिली. (Pune News)

बिबवेवाडीतील आयसीएआय भवन येथे आयोजित पत्रकार परिषदेत त्यांनी ही माहिती दिली. प्रसंगी केंद्रीय समितीचे सदस्य सीए चंद्रशेखर चितळे, ‘डब्ल्यूआयआरसी’च्या उपाध्यक्षा सीए दृष्टी देसाई, सचिव सीए अर्पित काबरा, ‘विकासा’चे अध्यक्ष सीए यशवंत कासार, विभागीय समितीचे सदस्य सीए आनंद जाखोटिया, सीए उमेश शर्मा, पुणे शाखेचे अध्यक्ष व खजिनदार सीए समीर लड्डा, उपाध्यक्ष व सचिव सीए काशिनाथ पठारे आदी उपस्थित होते. ‘सहकार’ विषयावर आयोजित दोन दिवसीय प्रशिक्षण कार्यक्रमाच्या निमित्ताने ‘डब्ल्यूआयआरसी’चे पदाधिकारी पुणे भेटीवर आले आहेत.

गादिया म्हणाले, ‘नोकरी अथवा व्यवसाय करण्यापूर्वी सनदी लेखापालातील नवनवीन कौशल्य विकसित व्हावीत, तसेच शिकतानाच त्यांना रोजगार मिळावा, यासाठी हा उपक्रम महत्त्वाचा आहे. ३६ तासांचा हा अभ्यासक्रम असून, त्याचे शुल्क २०० रुपये आहे. हा अभ्यासक्रम केल्यानंतर विद्यार्थ्यांना सीएकडे इंटर्नशिप देण्यात येणार असून, विद्यार्थ्यांच्या कामगिरीवर त्याला मानधन मिळणार आहे.’

चितळे म्हणाले, ‘इन्स्टिट्यूटच्या माध्यमातून नेहमी शासनाला मदत होत असते. देशातच नव्हे तर संपूर्ण जगात चार्टर्ड अकाउंटंट्सची मागणी आहे. सहकार क्षेत्रात सनदी लेखापालांची भूमिका महत्वपूर्ण आहे. त्या दृष्टीने या दोन दिवसांच्या चर्चासत्रात विचारमंथन झाले. येत्या काळात सहकार क्षेत्राला अधिकाधिक गती देण्यासाठी सनदी लेखापाल आपले योगदान देतील.’

मंत्री विश्वजित कदम यांच्या हस्ते उदघाटन

राज्याचे सहकार राज्यमंत्री विश्वजित कदम यांच्या हस्ते ‘सहकार’ विषयावरील दोन दिवसीय प्रशिक्षण कार्यक्रमाचे उदघाटन झाले. महाराष्ट्राला सहकार क्षेत्राची मोठी परंपरा आहे. या क्षेत्राला अधिकाधिक प्रगतिपथावर नेण्यासाठी सनदी लेखापालांचे सक्रिय योगदान महत्त्वाचे असल्याचे विश्वजित कदम यांनी सांगितले.