![panic among citizens due to sighting of drones in Khalad area of Purandar taluka marathi news](http://media.assettype.com/esakal%2F2024-06%2Fe6115eab-a4c6-4048-a28d-1b3edad61b15%2F___18_.jpg?w=480&auto=format%2Ccompress&fit=max)
खळद : खळद (ता. पुरंदर) येथे परिसरामध्ये गेले तीन दिवसापासून रात्री ८ ते १ या कालावधीमध्ये अनेक ड्रोन फिरत असल्याचे नागरिकांना दिसत आहे. यामुळे सर्वत्र रात्री आठ वाजले की इकडे ड्रोन आला, तिकडे ड्रोन गेला, या डोंगरावरती ड्रोन खाली उतरला, तर दुसऱ्या डोंगरावरून अवकाशात झेपावला, या ड्रोनची लाईट पांढरी आहे. तर दुसऱ्याची रंगीत आहे अशा वेगवेगळ्या चर्चा रात्रभर रंगत असून नागरिकांच्यामध्ये भीतीचे वातावरण निर्माण झाले आहे. या अज्ञात ड्रोन बाबत प्रशासनाने खुलासा करावा अशी मागणी येथील नागरिक करीत आहेत.
गेले काही दिवसापासून दौंड, बारामती तर पुरंदर तालुक्यातील काही गावामध्ये ड्रोन फिरत असल्याची माहिती नागरिकांना प्रसार माध्यमातून मिळत असतानाच खळद परिसरात खळद, पोमणनगर, पिंपळे, एखतपूर -मुंजवडी, खानवडी व सभोवतालच्या गावांत तीन दिवसापासून ड्रोन दिसू लागले आहेत. यामुळे या भागातील नागरिकांना जागरण करावे लागत आहे.
एकाच वेळी आकाशामध्ये चार ते पाच ड्रोन नागरिकांना वेगवेगळ्या दिशेला दिसत आहेत. याबाबत सासवड पोलीस स्टेशनशी नागरिकांनी संपर्क केला असता त्यांनी हे ड्रोन नसून विमान असल्याची प्राथमिक माहिती नागरिकांना दिली मात्र नागरिकांचे यावर समाधान झाले नसून नागरिकांनी ते खात्रीपूर्वक ड्रोन असल्याचे पोलिसांना सांगत हा प्रकार त्यांच्या निदर्शनास आणून देण्याचा प्रयत्न केला. तर एक दोन वेळा सासवड पोलीस स्टेशनचे अधिकारी हे गावांमध्ये येऊन त्यांनीही पाहणी केली.मात्र त्यांनी अद्याप पर्यंत हे ड्रोन की विमान याचा अधिकृत खुलासा केला नाही.
याबाबत सरपंच भाऊसाहेब कामथे, माजी सरपंच कैलास कामथे, ग्रामपंचायत सदस्य योगेश कामथे, माजी उपसरपंच सुरेश रासकर, ग्रामसेवक महेंद्र लोणकर, पवन कामथे यांनी सासवड पोलीस स्टेशन येथील पोलीस निरीक्षक अधिकारी यांची भेट घेऊन त्यांना सर्व वस्तुस्थिती सांगण्याचा प्रयत्न केला तर हे खात्रीपूर्वक ड्रोन असुन आपण याबाबत तातडीने कार्यवाही करावी यासाठी ग्रामस्थ आपणास सर्वतोपरी सहकार्य करतील असा विश्वास दिला.
पुरंदर तालुक्यात काही भागात ड्रोन गेल्यानंतर चोरीची घटना घडली असल्याची माहिती या भागात नागरिकांच्या मध्ये पसरली असल्याने या ड्रोनच्या माध्यमातून चोरीसाठी टेहाळणी केली जाते की काय? का कोणते सर्वेक्षण सुरू आहे, सर्वेक्षण सुरू असेल तर प्रशासनाला याची माहिती का नाही, ते रात्रीच का येतात, नागरिक दिसल्यावर अचानक लाईट बंद करून गायब का होत आहेत,असे अनेक प्रश्न नागरिकांना पडत असल्यामुळे सर्व नागरिक रात्रीचे घराच्या बाहेर जागे राहत आहेत. याबाबत तहसीलदार पुरंदर यांच्याशी संपर्क करण्याचा प्रयत्न केला असता संपर्क होऊ शकला नाही.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.